काठमाडौँ । कतारमा जारी फिफा विश्वकपको प्रि–क्वार्टरफाइनल चरणका खेलहरू सम्पन्न भइसकेका छन् । नेदरल्याण्ड्स, अर्जेन्टिना, क्रोएसिया, ब्राजिल, इंग्ल्याण्ड, फ्रान्स, मोरक्को र पोर्चुगलले क्वार्टरफाइनलमा स्थान बनाएका छन् ।
आफ्नो टोलीको उत्कृष्ट प्रदर्शनसँगै दर्शकहरुले फिफा विश्वकपमा प्रदान गरिने अवार्डमाथि पनि चासो राख्दछन् । यी मध्ये एक हो ‘गोल्डेन बुट’ । यो अर्वाड विश्वकपमा सबैभन्दा धेरै गोल गर्ने खेलाडीलाई दिइन्छ ।
अन्तिम पटक २०१८ मा रसियामा भएको विश्वकपमा इङ्ल्यान्डका ह्यारी केनलाई गोल्डेन बुट दिइएको थियो । उनले ६ गोल गरेका थिए ।
गोल्डेन बुटको दौडमा फ्रान्सका किलियन एम्बाप्पे सबैभन्दा अगाडि छन् । उनले चार खेलमा पाँच गोल गरेका छन् । एमबाप्पे बाहेक इंग्ल्यान्डका मार्कुस रासफोर्ड र बुकायो साका जस्ता युवा खेलाडी दावेदार छन् । यसैबीच, अर्जेन्टिनाका अनुभवी खेलाडी लियोनल मेसी पनि यसको दावेदार छन् ।
गएराति भएको खेलमा पोर्चुगलले स्वीट्जरल्याण्डलाई ६–१ गोलले पराजित गर्दा पोर्चुगलका गोन्सालो रामोसले ह्याट्रिक गर्दै गोल्डेन बुटको दावेदारी प्रस्तुत गरेका छन् । जारी विश्वकपमा ह्याट्रिक गर्ने उनी पहिलो खेलाडी समेत बने ।
खेलाडी देश गोल संख्या
किलियन एम्बाप्पे फ्रान्स ५
लियोनल मेसी अर्जेन्टिना ३
बुकायो साका इंग्ल्याण्ड ३
मार्कुस रासफोर्ड इंग्ल्याण्ड ३
ओलिभर जिरुड फ्रान्स ३
रिचार्लिसन ब्राजिल ३
गोन्सालो रामोस पोर्चुगल ३
