बुटवल । नेत्रविक्रम चन्द नेतृत्वको नेकपालाई राजनीतिक मूलधारमा ल्याउन सरकार र उक्त समूहबीच द्विपक्षीय वार्ता भएको छ । गृहमन्त्री बालकृष्ण खाणले दुई दिनअघि भैरहवामा नेकपाका प्रवक्ता खड्गबहादुर विश्वकर्मासँग वार्ता भएको जानकारी दिनुभयो ।
रुपन्देहीको तिलोत्तमास्थित करौजियामा मंगलबार एक कार्यक्रममा गृहमन्त्री खाणले वार्तामा कारागारमा रहेका बन्दीलाई प्रक्रिया मिलाएर छाड्ने, मुद्दा फिर्ता लिने लगायतका विषयमा कुराकानी भएको बताउनुभयो ।
पूर्ववर्ती सरकारले गरको सम्झौताअनुरुप कतिपयलाई छाडिसकिएको पनि मन्त्री खाणले जानकारी दिनुभयो । अन्यलाई कारागारमुक्त गर्न कानून संशोधनका लागि फाइल कानून मन्त्रालयमा पठाइसकिएको उहाँको भनाइ थियो ।
मन्त्री खाणले नेकपा कार्यकर्तासमेत निर्वाचनमा भाग लिन खोजे प्रशासनले धरपकड नगर्ने र अन्य नागरिकसरह मतदान गर्ने अवसर दिइने प्रस्ताव गरेको जानकारी दिनुभयो । यद्यपि मतदान बिथोल्न खोजे र मतदातालाई आतंकित पार्न खोज सरकार चुप लागेर नबस्ने उहाँले वार्ताका क्रममा भनेको बताउनुभयो ।
उहाँका अनुसार नेकपा वार्ता टोलीका संयोजक विश्वकर्माले काठमाडौँमा जारी रहेको सो पार्टीको बैठकमा प्रस्ताव राख्ने र सरकारसँग थप छलफल तथा सम्झौता गर्ने जानकारी दिनुभएको छ ।
