काठमाडौं । बारा क्षेत्र नम्बर ४ बाट प्रतिनिधिसभा सदस्य निर्वाचनमा स्वतन्त्र उम्मेदवारी दिएका कांग्रेसका बागी इच्छाबहादुर वाग्लेलाई एमाले त्यागेका प्रभु साह र बद्री न्यौपानेले साथ दिएका छन् ।
मंगलबार फेटा गाउँपालिकामा क्षेत्रीय सभा कार्यक्रम गरी वाग्लेलाई समर्थन रहेको बताउन लागेका हुन् । सभालाई वाग्लेसहित, साह र न्यौपानेले पनि सम्बोधन गर्ने कार्यक्रम छ ।
बारा क्षेत्र नम्बर ४ मा गठबन्धनको तर्फबाट एकीकृत समाजवादीका कृष्णकुमार श्रेष्ठ (किसान) र एमाले–जसपा गठबन्धनबाट एमालेका एकबाल मिया उम्मेदवार रहेका छन् ।
बारा–४ बाट नेपाली कांग्रेसको तर्फबाट इच्छाबहादुर वाग्ले टिकटको दाबेदार थिए । तर गठबन्धनको भागबण्डामा एकीकृत समाजवादीबाट पूर्व श्रममन्त्री कृष्णकुमार श्रेष्ठले टिकट पाएपछि वाग्लेले स्वतन्त्र रुपमा उम्मेदवारी दिएर प्रतिस्पर्धामा उत्रिएका हुन् ।
वाग्लेलाई ‘स्वतन्त्र उम्मेदवार जिताऔं अभियान’ चलाएका प्रभु साहले साथ दिएका छन् । एमाले केन्द्रीय सदस्य त्यागेर बद्रि न्यौपानेले पनि साहको अभियानमा लागेका छन् । एमालेले चुनावमा जसपासँग गठबन्धन गरेपछि साह र न्यौपाने दुवै मिलेर ‘स्वतन्त्र उम्मेदवार जिताऔं अभियान’ चलाएका हुन् ।
स्थानीय तह निर्वाचनमा वडा अध्यक्षहरुले पाएको मतको आधारमा बारा क्षेत्र नम्बर ४ मा नेकपा एमाले पहिलो, कांग्रेस दोस्रो र लोसपा तेस्रो पार्टी हुन् ।
