पोखरा । नेकपा (एमाले) का अध्यक्ष केपी शर्मा ओलीले माओवादी अध्यक्ष पुष्पकमल दाहाल प्रचण्डको संगतले प्रधानमन्त्री शेरबहादुर देउवाले बन्दुकको भाषण गर्न थालेको आरोप लगाउनुभएको छ ।
पोखरामा सोमबार आयोजित बृहत् कार्यकर्ता भेलालाई सम्बोधन गर्दै अध्यक्ष ओलीले बन्दुक लिएर सीमामा जान प्रधानमन्त्री देउवालाई चुनौती दिनुभयो । प्रधानमन्त्री देउवाले केही दिनअघि सीमा बचाउन बन्दुक लिएर जान ओलीलाई चुनौती दिनुभएको थियो ।
बन्दुकले मात्र सबै समस्या समाधान नहुने, तथ्यका आधारमा समाधान खोजिनुपर्ने भन्दै एमाले अध्यक्ष ओलीले प्रचण्डको संगतले प्रधानमन्त्री देउवाले बन्दुको भाषा बोलेको बताउनुभयो ।
आफूले गुमेको भूमि फिर्ता ल्याउनुपर्छ भनेको तर भोलिपल्टै प्रधानमन्त्री देउवाले ‘भाषण गर्दैमा भूमि फिर्ता आउँदैन, बन्दुक लैजानुस्’ भनेको भन्दै ओलीले भन्नुभयो, “म कठैबरा भन्छु । बन्दुक लिएर होइन, कुरा गरेर शेरबहादुरजी, कुरा गरेर फिर्ता ल्याउँछौँ । प्रचण्डको संगत गरेर बन्दुककै भाषण गर्न थालेछन् । बन्दुकले केही गर्दैन, तर्क तथ्यले गर्छ ।”
