काठमाडौँ । नेपाली कांग्रेसका सभापति एवं प्रधानमन्त्री शेरबहादुर देउवाको इच्छाका कारण पार्टीको चुनावी घोषणापत्रमा वृद्धभत्ता दिने उमेर घटाइएको छ ।
आइतबार आयोजित पत्रकार सम्मेलनमा नेपाली कांग्रेसको घोषणापत्र मस्यौदा समितिका सदस्य डा स्वर्णिम वाग्लेले घोषणापत्रमा ६५ वर्षमा वृद्धभत्ता दिने पार्टी सभापति देउवाको इच्छाबमोजिम भएको बताउनुभयो ।
अहिले ६८ वर्ष उमेर पुगेका ज्येष्ठ नागरिकले वृद्धभत्ता पाउँदै आएका छन् ।
घोषणापत्र आफ्नो संकल्पपत्र मात्र नभएर नेपाली कांग्रेसकै संकल्पपत्र भएको उल्लेख गर्दै उहाँले भन्नुभयो, “पार्टी सभापति शेरबहादुर देउवा हुनुहुन्छ, केन्द्रीय समितिमा ८० प्रतिशतको उहाँलाई समर्थन छ, उहाँले नै ६५ वर्षमा वृद्धभत्ता दिने इच्छा राख्नुभएको हो ।”
डा वाग्लेका अनुसार यसअघिको वृद्धभत्ता पाउने उमेर ७० वर्षबाट ६८ वर्षमा झार्ने काम पनि प्रधानमन्त्री देउवाकै कार्यकालमा भएको हो । “६५ वर्षसम्म क्रमशः ५ वर्षको कार्यकालमा पुर्याउनुपर्छ भन्ने इच्छा बमोजिम यो प्रतिबिम्बित भएको हो”, उहाँले भन्नुभयो ।
आगामी मंसिर ४ गते हुने प्रतिनिधिसभा र प्रदेशसभा सदस्यको निर्वाचनका लागि नेपाली कांग्रेसले सार्वजनिक गरेको घोषणापत्रमा वृद्धभत्ता दिने उमेर क्रमशः ६५ वर्षमा झारिने उल्लेख छ ।
