महेन्द्रनगर । सुदूरपश्चिमका नौ वटै जिल्लामा आज हुने प्रतिनिधि र प्रदेशसभाको उम्मेदवार मनोनयन दर्ताको सबै तयारी पूरा भएको छ ।
सुदूरपश्चिम प्रदेश निर्वाचन कार्यालय धनगढीका प्रमुख प्रेम भट्टले यहाँका १६ वटै प्रतिनिधि र ३२ वटा प्रदेशसभा निर्वाचन क्षेत्रमा मनोनयन दर्ताको तयारी पूरा भएको जानकारी दिनुभयो ।
“अहिलेसम्म निर्वाचन अधिकृतको कार्यालय मनोनयन दर्ताका लागि आएका छैनन् ।” उहाँले भन्नुभयो–“ निर्वाचन कार्यालय तयारी अवस्थामा छन् ।”
सुदूरपश्चिमको डडेल्धुराबाट प्रधानमन्त्री एवं नेपाली कांग्रेसका सभापति शेरबहादुर देउवाको मनोनयन दर्ता हुनेछ । आगामी मङ्सिरमा हुने प्रतिनिधि र प्रदेशसभा निर्वाचनमा सुदूरपश्चिम प्रदेशमा १६ लाख ५८ हजार चार मतदाताले मतदान गर्ने पाउनेछन् ।
प्रदेश निर्वाचन कार्यालय अनुसार सबैभन्दा बढी मतदाता कैलालीमा पाँच लाख पाँच सय १४ जना रहेका छन् । कैलालीमा प्रतिनिधिसभाका पाँच र प्रदेशसभाका दश वटा निर्वाचन क्षेत्र छन् ।
त्यसैगरी कञ्चनपुरमा तीन लाख दुई हजार पाँच सय नौ जना, डडेल्धुरामा ९१ हजार २०१, एक लाख ५० हजार एक सय ५६ मतदाता रहेको प्रदेश निर्वाचन कार्यालयले जनाएको छ ।
त्यस्तै सुदूरपश्चिमको अर्को पहाडी जिल्ला दार्चुलामा ८९ हजार एक सय ५४, डोटीमा एक लाख २४ हजार आठ सय ७०, बझाङमा एक लाख २२ हजार तीन सय ७६ मतदाता रहेका छन् । यहाँको अछाम जिल्लामा एक लाख ५८ हजार ६ सय ५७ मतदाता छन् ।
मनोनयन दर्ताका लागि उद्योग वाणिज्य तथा आपूर्तिमन्त्री दीलेन्द्रप्रसाद बडू दार्चुला पुगिसक्नु भएको छ । त्यसैगरी पूर्वमन्त्री तथा विभिन्न पार्टीका केन्द्रीय नेताहरु मनोनयनका लागि आ–आफ्नो निर्वाचन क्षेत्रमा पुग्ने क्रम जारी रहेको छ
