काठमाडौँ । सत्ता साझेदार नेकपा (माओवादी केन्द्र)का अध्यक्ष पुष्पकमल दाहाल प्रचण्डसहितको टोली राष्ट्रपति विद्यादेवी भण्डारीलाई भेट्न शीतल निवास पुगेका छन् ।
राष्ट्रपति भण्डारीको निमन्त्रणामा अध्यक्ष प्रचण्डसहित माओवादी नेताको टोली शीतल निवास गएको हो । उनीहरू बुधवार दिउँसो २ बजे शीतल निवास पुगेका हुन् ।
नागरिकता विधेयक पुनर्विचार गर्न संसदमा फिर्ता पठाउनुभएको राष्ट्रपति भण्डारीले यसअघि नेपाली कांग्रेस र नेकपा एमालेका नेताहरूसँग छलफल गरिसक्नुभएको छ ।
नागरिकता विधेयक विषयमा राष्ट्रपति भण्डारी र सत्तारुढ दलबीच पछिल्लो समय दूरी बढेको छ । संसद्को दुवै सदनबाट पारित भई प्रमाणीकरणका लागि राष्ट्रपतिकहाँ पुगेको नागरिकता विधेयक राष्ट्रपतिले पुनर्विचारका लागि सन्देशसहित संसद्मै फिर्ता पठाउनुभएको थियो ।
प्रतिनिधिसभाले सो विधेयकमाथि कुनै पुनर्विचार नगरी हुबहु पारित गरेपछि राष्ट्रपति भण्डारी र सत्तारुढ दलबीच दूरी बढेको हो ।
