काठमाडौं । नेकपा एमालेका पोलिटब्यूरो सदस्य एवम् सांसद महेश बस्नेतले सामाजिक सञ्जालमार्फत आफ्नो चरित्र हत्या गरिएको भन्दै उजुरी दिने भएका छन् ।
नेकपा माओवादी केन्द्र निकट युवा संगठन वाईसीएलबाट महेश बस्नेत लखेटिएको भन्दै सामाजिक सञ्जालमा भिडियो शेयर भइरहेको छ, जुन अहिले निकै भाइरल बनेको छ ।
बस्नेतको सचिवालयका अनुसार माओवादी केन्द्रकै कार्यकर्ताबीच केही महिना अगाडि भएको तनावको भिडियो राखेर चरित्र हत्याको प्रयत्न गरिएकाले उनले उजुरी दिने तयारी गरेका हुन् ।
भिडियोमा देखिएको तनाव भने गएको स्थानीय चुनावको रहेको छ । माओवादी केन्द्रले सिन्धुपाल्चोकको चौताराको मेयरमा कृष्णप्रसाद सापकोटालाई टिकट दिएपछि असन्तुष्ट पक्षले रोक्न खोजेका थिए । त्यही भिडियो सामाजिक सञ्जालमा पोष्ट गरेर महेश बस्नेत वाइसीएलको कार्यकर्ताबाट लखेटिएको भनि प्रचार गरिएको छ ।
