बुटवल । प्रहरीले मृत व्यक्तिलाई जीवित बनाएको दावी गर्ने एक पास्टरलाई पक्राउ गरेको छ । प्रहरीले बुटवलको होली क्यालभरी चर्चका पास्टर राजेन्द्र गोतामेलाई सोमबार दिउँसो बुटवलबाट पक्राउ गरेको हो ।
कञ्चनपुरका ३५ वर्षीय पास्टर गोतामेले मृत व्यक्तिलाई जीवित बनाएको भन्दै भ्रम फैलाएका थिए । उनलाई थप अनुसन्धानका लागि जिल्ला प्रहरी कार्यालय रुपन्देही पठाइएको बताइएको छ ।
आइतबार विवेक सत्यालको नामबाट सार्वजनिक भएको भिडियोमा पास्टर गोतामेले एक ‘मृत’ महिलालाई जीवित गराएको देखाइएको छ ।
दुई मिनेट ४५ सेकेन्डको सो भिडियो भाइरल भएपछि जिल्ला प्रशासन कार्यालय रुपन्देहीले अनुसन्धान गर्न आदेश दिएको थियो । प्रमुख जिल्ला अधिकारी भरतमणि पाण्डेको सो आदेशपछि इलाका प्रहरी कार्यालय बुटवलले भिडियो सार्वजनिक गर्ने व्यक्तिको फेसबुक एकाउन्टका आधारमा अनुसन्धान गरेर गोतामेलाई पक्राउ गरेको हो ।
भाइरल भएको भिडियोमा भुइँमा एक महिला ‘मृत’ जस्तै सुतेकी छन् । पास्टरको तन्त्रमन्त्रले केही बेरमा ती महिला उठेर हिँडेको देखिन्छ । त्यसपछि पास्टर गोतामेले ‘प्रमु यशुको प्रभावले मृत्यु भएकी महिलालाई जीवित गराएको’ भन्दै यशुलाई धन्यवाद दिन भनेका छन ।
