पर्सा । जिल्लाको वीरगञ्जमा दाजुभाइ मिलेर बहिनीको प्रेमीको हत्या गरेका छन् । प्रहरीले सो घटनामा संलग्न रहेको आरोपमा बाराको विश्रामपुर घर भएका २८ वर्षीय उत्तम पटेल र ३० वर्षीय प्रितम पटेललाई पक्राउ गरेको छ ।
बाराको विश्रामपुर–५ का २३ वर्षीय राजकुमार ठाकुर ट्युसन पढ्न साइकलमा जाँदै गर्दा हराएपछि प्रहरीले अनुसन्धान थालेको थियो ।
उनको शव शुक्रबार भेटिएको थियो । पटेल दाजुभाइको बयानको आधारमा ठाकुरको शव रक्सौलबाट मुज्जफपुर चल्ने ट्रेनको शौचालय छेउमा भेटिएको हो । ठाकुरको शव बोरामा प्याक गरेको अवस्थामा भेटिएको पर्सा प्रहरीले जनाएको छ ।
हत्याआरोपी दाजुभाइ वीरगञ्ज महानगरपालिका–१६ मा टेलर चलाउँदै आएका थिए ।
प्रहरीका अनुसार उनीहरूले आफ्नै टेलरभित्र लगेर ठाकुरको हत्या गरेको र मोटरसाइकलमा शव राखी रक्सौलमा रोकिराखेको ट्रेनको डिब्बामा छाडेका थिए ।
प्रेम गरेको रिसइबीमा ठाकुरको हत्या गरिएको उनीहरुले प्रहरी समक्ष बयान दिएका छन् ।
वीरगन्जस्थित भारतीय महावाणिज्य दूतावासको पहलमा मृतकको शव पर्सा प्रहरीले शनिबार साँझ भागलपुरबाट वीरगन्ज ल्याएको छ । नारायण अस्पतालमा राखिएको शवको पोष्टमार्टमपछि आवश्यक कारबाही अगाडि बढाइने पर्सा प्रहरीले जनाएको छ ।
