काठमाडौं । नेकपा (माओवादी केन्द्र)को भातृसंगठन वाईसीएलको सहमतिमै नेतृत्व चयन गर्ने प्रयास असफल भएको छ ।
शनिबारदेखि जारी दुई दिने सम्मेलनमा हिजै सकिनु पर्नेमा नेतृत्वमा दावेदार रहेकाहरू सहमतिमा नआउँदा सम्मेलन लम्बिन पुगेको छ ।
सहमति टुंग्याउन भन्दै आइतबारको सम्मेलन स्थगित गरिएको थियो । तर, सहमतिको प्रयास असफल भएपछि पदाधिकारीको टुंगो पार्टी अध्यक्ष पुष्पकल दाहाल ‘प्रचण्ड’ ले लगाएका छन् । यद्यपि, कसलाई अघि सारेको भन्नेबारे खुलाइएको छैन ।
सबै जिल्लाबाट केन्द्रीय सदस्यको प्रतिनिधित्व हुने गरी प्रदेशहरूले सूची पठाएपछि आजै पदाधिकारीसहितको कमिटी घोषणा गरेर राष्ट्रिय सम्मेलन टुंगिने बताइएको छ ।
हालका अध्यक्ष रामप्रसाद सापकोटा ‘दीपशिखा’ ले नेतृत्व छाड्ने भएपछि अध्यक्षका लागि तीनजना दाबेदार छन् । वाईसीएल अध्यक्षका लागि सुबोध सेर्पाली, सुमन देवकोटा र यशोदा न्यौपानको दाबी रहेको छ ।