नेपाली काँग्रेसका सहमहामन्त्री डा महतले आफूले अनुकुल समय आएपछि आफूले उम्मेदवारी घोषणा गर्ने बताउनुभएको छ । उहाँले कांग्रेसको यही भदौ १८ देखि सुरु भएको वडा अधिवेशनमा उत्साहपूर्वक सहभागिता देखिएको बताउँदै भन्नुभयो “वडा अधिवेशनले पार्टीभित्र ऊर्जा र जाँगर थपेको छ ।”
सहमहामन्त्री डा महतलाई यहाँको उम्मेदवारी केमा हुन्छ भनी पत्रकारले गरेको प्रश्नमा उहाँले कांग्रेसको महाधिवेशन आउन झण्डै तीन महिना समय बाँकी रहेको भन्दै अनुकूल समय आएपछि आफूले उम्मेदवारी घोषणा गर्ने बताउनुभयो । उहाँले सामान्यतया आफूले उपाध्यक्ष या महामन्त्रीमा आफ्नो मानसिकता बनिसकेको भन्दै तर समय आएपछि औपचारिक रुपमा उम्मेदवारी घोषणा गर्ने बताउनुभएको हो ।
रिपोर्टर्स क्लब नेपालले आज यहाँ आयोजना गरेको साक्षात्कार कार्यक्रममा पूर्वपरराष्ट्रमन्त्री डा महतले सरकारले सबै मित्रराष्ट्रसँग एउटै विदेश नीति अवलम्बन गर्ने बताउनुभयो ।
उहाँले वर्तमान सरकारले विदेश नीति अबलम्बन गर्दा एउटै मापदण्ड अपनाउने बताउनुभएको हो । “एउटा मित्रराष्ट्रसँग सम्बन्ध राख्दा एउटा मापदण्ड र अर्को मित्रराष्ट्रसँग सम्बन्ध राख्दा अर्को मापदण्ड बनाउनु हुँदैन”, उहाँले भन्नुभयो ।
उहाँले वर्तमान सरकारले विश्वासका आधारमा छिमेकी देशबीचको सम्बन्ध अगाडि बढाएको बताउनुभयो । डा महतले नेपालको परराष्ट्र नीतिको मूलमन्त्र आफ्नो देशको स्वार्थ र हितको संरक्षण गर्नु भएको स्पष्ट पार्नुभयो । सरकारले आफ्नो स्वार्थ र आवश्यकतालाई केन्द्रविन्दुमा राखेर विदेश नीति बनाउने उहाँको भनाइ छ ।
उहाँले चीनसँगको सीमा विवादका विषयमा सरकारले अध्ययन समिति बनाएकाले त्यसको निष्कर्ष के आउँछ त्यसैका आधारमा हुने बताउनुभयो । जस्तो कि भारतसँग पनि हालैको महाकालीमा तुइन घटनाका विषयमा सरकारले छानबीन समिति बनाएर नै अनुसन्धान गरेको र त्यसको निष्कर्षका बारेमा नेपाल सरकारले काम गरिरहेको पनि बताउनुभयो ।
उहाँले एमसिसीका विषयमा गरिएको एक प्रश्नमा भन्नुभयो कतिपय पक्षमा नागरिकबाट प्रश्नहरु उठिरहेकाले त्यस विषयमा सम्बन्धित निकायले स्पष्ट पार्ने नै छ भन्नुभयो । रासस
