काठमाडौँ । नेकपा (एकीकृत समाजवादी) का सम्मानित नेता झलनाथ खनालले एसपीपीमा सहभागी नहुने भनेर अमेरिकालाई पत्राचार गर्ने मन्त्रिपरिषद्ले गरेको निर्णय कार्यान्वयन नगरिको भन्दै आपत्ति प्रकट गर्नुभएको छ ।
प्रतिनिधिसभाको बैठकमा विशेष समय लिएर बोल्दै उहाँले सरकारले गरेको निर्णय कार्यान्वयन हुँदैन भने मुलुकको कार्यकारी अधिकार कहाँ कोसित छ भनी प्रश्न गर्नुभयो ।
नेता खनालले एसपीपी स्वीकार नगर्ने भनेर मन्त्रिपरिषद् एक महिनाअघि नै निर्णय गरेको स्मरण गराउनुभयो ।
एसपीपी स्वीकार गर्दैनौँ भनेर तुरुन्तै पत्र लेख्ने भनेको सरकारले अहिलेसम्म पनि लेख्न नसक्नुको कारण के भनी प्रश्न गर्दै भन्नुभयो, “कार्यकारी अधिकार भएको क्याबिनेटले निर्णय गरिसकेपछि फेरि अरु कसले रोक्न सक्छ यो देशमा ? कि हाम्रो देशको क्याबिनेटभन्दा बाहिर कता छ कार्यकारी अधिकार ?”
