काठमाडौँ । प्रतिनिधिसभाको बिहीबारको बैठकमा सत्तारुढ नेकपा (माओवादी केन्द्र) ले अमेरिकासँगको स्टेट पार्टनरसीप प्रोग्राम (एसपीपी) स्वीकार नगर्ने पत्र पठाउन रुलिङको माग गरेको छ ।
बैठकमा विशेष समय लिएर माओवादी केन्द्रका प्रमुख सचेतक देव गुरुङले परराष्ट्र मन्त्रालयको एसपीपीमा सहभागी नहुने भनेर तत्काल पत्र पठाउन नसकिने भन्ने भनाइप्रति आपत्ति प्रकट गर्नुभयो ।
बुधबार परराष्ट्र मन्त्रालयका प्रवक्ता सेवा लम्सालले एसपीपीअन्तर्गत केही सहयोग यसअघि नै आइसकेको भन्ने तथ्यहरु देखिएको भन्दै कहाँ र कसरी त्यस्ता सहयोग आए भन्नेबारे टुंगोमा पुगेर मात्र पत्राचार गरिने बताउनुभएको थियो ।
उहाँले विपद् व्यवस्थापनलगायत के केमा सहयोग प्राप्त भएको हो त्यसको अध्ययन गरेर उपयुक्त समयमा पत्राचार गरिने जानकारी दिनुभएको थियो ।
प्रमुख सचेतक गुरुङले परराष्ट्र मन्त्रालयको भनाइ मन्त्रिपरिषद्को निर्णय विपरीत भएको बताउनुभयो । उहाँले मन्त्रिपरिषद्को निर्णय कार्यान्वयन गर्ने दायित्व मन्त्रालयहरुको रहेको भन्दै त्यसलाई परराष्ट्र मन्त्रालयलयले कार्यान्वयन गर्न अटेरी गरिरहेको बताउनुभयो ।
नेपालले एसपीपी अस्वीकार गर्ने भनेपछि त्यही विषय राखेर अर्को नाममा सम्झौता गर्न खोजेको आशंका रहेको भन्दै उहाँले एसपीपीमा सहभागी नहुने भनेर पत्राचार गर्न संसद्ले रुलिङ गर्नुपर्ने माग गर्नुभयो ।
