काठमाडौँ । बजेट निर्माणमा अनधिकृत व्यक्तिलाई प्रवेश गराएको आरोप लागेका शर्मामाथि छानबिन गर्न बनेको संसदीय समितिले अर्थ मन्त्रालयको सिसिटिभी फुटेज ‘रिस्टोर’ हुने सफ्टवेयर मगाएको छ।
आइतबार समितिको टोलीले अर्थ मन्त्रालय गएर सिसिटिभीको फुटेज माग्दा अर्थका प्राविधिकहरुले फुटेज नभएको जानकारी दिएपछि सफ्टवेयर नै मगाएको हो ।
समितिको सिंहदरबारमा बस्ने बैठकमा प्राविधिक बोलाएर सफ्टवेयरमा भएका फुटेज हेर्न लागिएको बताइएको छ ।
समितिले फुटेज रिस्टोर गर्न सकिने भन्दा पनि अर्थका प्राविधिकले बारम्बार आफूहरुसँग रिस्टोर गर्ने क्षमता नभएको बताएका थिए । त्यसैले समितिले फुटेज रिस्टोर गर्न सकिने सफ्टवेयर नै मगाएर हेर्न लागेको हो ।
तत्कालीन अर्थमन्त्री जनार्दन शर्मामाथि आव २०७९/०८० को बजेट निर्माणका क्रममा बजेट घोषणा हुनु एक दिनअघि राति अर्थ मन्त्रालयमा अनधिकृत व्यक्तिलाई बोलाएर करका दर हेरफेर गरेको आरोप लगाइएको थियो ।
त्यसपछि सो प्रकरणको छानबिन गर्न ११ सदस्यीय संसदीय विशेष छानबिन समिति गठन भएको थियो भने अर्थमन्त्री शर्माले छानबिनलाई सघाउने भन्दै राजीनामा दिएका थिए ।
