काठमाडौं । करणी गरेको आरोपमा जाहेरी परेपछि फरार रहेका अभिनेता पल शाहबारे प्रहरीले फिल्म निर्देशक सुदर्शन थापासँग सोधपुछ गरिरहेको छ ।
शाहको खोजीमा रहेको प्रहरीले तीन दिनसम्म उनलाई फेला पार्न नसकेपछि निकटहरूसँग सोधपुछ अगाडी बढाएको हो ।
थापा शाह अभिनित फिल्म ‘म यस्तो गीत गाउँछु-२’ का निर्देशक हुन्। थापासँग अहिले महानगरीय प्रहरी वृत्त बानेश्वरले सोधपुछ गरिरहेको बताइएको छ ।
थापालाई शनिबार दिउँसो प्राइम टाइम्स टेलिभिजनमा अन्तर्वार्ता दिएलगत्तै प्रहरीले लिएर गएको पत्रकार ऋषि धमलाले जानकारी दिए ।
यता प्रहरीले भने थापासँग जानकारी माग्ने उद्देश्यले कार्यालयमा ल्याइएको बताएको छ ।
नाबालिका गायिकाले शाहविरूद्ध गत बुधबार तनहुँ प्रहरीमा जबरजस्ती करणीको जाहेरी दिएकी थिइन् । जाहेरी दर्तापछि शाहविरूद्ध पक्राउ पूर्जी जारी भएको छ। शाहलाई खोज्न देशभरका प्रहरी युनिटलाई प्रहरीले सर्कुलर जारी गरेको छ ।
