काठमाडौं । कानुन, न्याय तथा संसदीय मामिलामन्त्री गोविन्द प्रसाद कोइराला शर्माले जिल्ला अदालत काठमाडौंका न्यायाधीश राजकुमार कोइराला र अधिवक्ता रुद्र पोखरेलबीचको कुराकानीको अडियोबारे छानबिन भइरहेको बताउनु भएको छ ।
न्यायाधीश कोइराला र अधिवक्ता पोखरेलबीच व्यवसायी इच्छाराज तामाङलाई धरौटीमा छुटाउनका लागि घुस लेनदेनबारे कुराकानी भएको अडियो बुधबार सार्वजनिक भएको थियो ।
बिहीबार संघीय संसद भवनमा पत्रकारहरुले सोधेको प्रश्नको जवाफ दिँदै मन्त्री शर्माले सत्यतथ्य पत्ता लगाउन छानबिन समिति गठन गरिएको जानकारी दिनु भएको हो ।
‘जुन अडियो बाहिर सार्वजनिक भएको छ । त्यसको सत्यतथ्य खोजबिन गर्दैछौं । कति ठीक, कति बेठीक भनेर छानबिन गर्न समिति नै गठन गरिएको छ’ मन्त्री शर्माले बताउनुभयो ।
न्यायालयमा विकृति र विसंगति बढ्दै गएकोप्रति असन्तुष्टी जनाउँदै मन्त्री शर्माले न्यायालयभित्र स्वच्छता कायम गर्नेतर्फ विभिन्न उपायमाथि छलफल भइरहेको पनि बताउनुभयो ।
