काठमाडौं । नेपाल राष्ट्र बैंकका गभर्नर महाप्रसाद अधिकारीको मुद्दाको किनारा लगाउन आज सर्वोच्च अदालतमा बहस हुँदैछ ।
मन्त्रिपरिषद्को बैठकले गभर्नर अधिकारीलाई निलम्बन गर्ने निर्णय गरेसँगै उक्त निर्णयविरुद्ध सर्वोच्चमा रिट हाल्नुभएका अधिकारी सर्वोच्च अदालतको अन्तरकालीन अन्तरिम आदेशबाट काममा फर्कनुभएको थियो ।
गभर्नर अधिकारीले दायर गर्नुभएको रिटमाथि मङ्गलबार न्यायाधीशद्वय सपना प्रधान मल्ल र टङ्कबहादुर मोक्तानको इजलासमा सुनुवाइ प्रारम्भ भएको थियो । मङ्गलबार बहस नसकिएपछि हेर्दाहेर्दैमा राखिएको थियो । आज उक्त रिट पुनः इजलासमा चढेकाले बहस हुन लागेको हो ।
नौ नम्बरको इजलासको पहिलो नम्बरमा रहेको उक्त मुद्धाको सुनवाइ मङ्गलबारकै न्यायाधीशद्वय मल्ल र मोक्तानले गर्नुहुने भएकाले सम्भवतः मुद्दाको किनारा आजै लाग्नेछ ।
सरकारले गत चैत २५ गते गभर्नर अधिकारीलाई निलम्बन गरी जाँचबुझ समिति गठन गरेपछि सोविरुद्ध अधिकारी सर्वोच्च अदालत जानुभएको थियो । उक्त रिटको प्रारम्भिक सुनुवाइ गर्दै न्यायाधीश हरिप्रसाद फुँयालको एकल इजलासले अन्तरकालीन अन्तरिम आदेश दिएसँगै गभर्नर अधिकारी यही वैशाख ६ गते काममा फर्कनुभएको थियो ।
