विराटनगर । मोरङको धनपालथान गाउँपालिका कर्सियामा भारतीय लुटेरा समूहले बैंक लुट्ने प्रयास गरेका छन् । उनीहरु असफल भएको प्रहरीले जनाएको छ ।
प्रहरीका अनुसार सोमबार दिउँसो सिटिजन्स बैंकको कर्सिया शाखामा रकम लुट्ने उद्देश्यले छिरेको समूहलाई सुरक्षागार्डले रोक्न खोजेका थिए, त्यसक्रममा गार्डलाई लुटेरा समूहले चलाएको गोली लागेको र उनलाई उपचारका लागि अस्पताल पठाइएको छ ।
गोली चलेलगत्तै जिल्ला प्रहरी कार्यालय, मोरङको टोली पुगेर लुटेरा समूहका तीन जनालाई पक्राउ गरेको छ । पक्राउ परेकाहरुलाई पनि गोली लागेको बताइएको छ ।
पक्राउ परेका व्यक्तिहरुको पहिचान खुलाउने प्रयास भइरहेको र उनीहरु भारतीय नागरिक भएको प्रहरीले प्रारम्भिक जानकारी दिएको छ । घटनाबारे प्रहरीले थप अनुसन्धान थालेको छ ।