युनाइटेड अरब इमिरेट्स (युएई) मा जारी इन्डियन प्रिमियर लिग (आइपिएल) को उपाधि चेन्नाई सुपर किंग्सले जितेको छ ।
दुबईमा शनिबार सम्पन्न फाइनल खेलमा महेन्द्र सिंह धोनीको कप्तानीमा रहेको चेन्नाईले कोलकाता नाइट राइडर्सलाई २७ रनले पराजित गरेको हो ।
टस हारेर पहिले ब्याटिङको निम्तो पाएको चेन्नाईले २० ओभरमा तीन विकेट गुमाएर १९२ रनको विशाल लक्ष्य प्रस्तुत गरेको थियो । चेन्नाईका लागि प्रारम्भिक ब्याट्सम्यान फाफ डु प्लेसिसले व्यक्तिगत ८६ रन बनाएका थिए । उनले ३ छक्का र ७ चौका प्रहार गरेका थिए ।
यस्तै चेन्नाईका लागि रुतुराज गाइकवाडले ३२, रोबिन उथप्पाले ३१ र मोइन अलिले ३७ रनको योगदान गरेका थिए ।
जवाफमा १९३ रनको विशाल लक्ष्य पछ्याएको कोलकाताले ९ विकेट गुमाएर १६५ रन मात्र बनाउन सकेको थियो । कोलकाताका लागि ओपनरद्वय शुभमन गिलले ५१ र बेंकटेस ऐयरले ५० रन बनाएका थिए । अन्य खेलाडीले खासै रन बनाउन सकेनन् ।
आजको खेलमा चेन्नाईका रबिन्द्र जडेजाले फिल्डिङ र बलिङ दुबैमा उत्कृष्ट प्रदर्शन गरेका थिए ।
याे जितसँगै चेन्नाइले चार पटक आइपिएलकाे उपाधि जितेकाे छ ।