इङलिस प्रिमियर लिगको यस सिजनमा राम्रो सुरुआत गरेको लिभरपुलले वाटफोर्डलाई ५ – ० गोल अन्तरले पराजित गरेको छ ।
लिभरपुलका स्टार स्टाइकर साडियो मानेले पहिलो हाफको नवौं मिनेटमै मोहम्मद सलाहले दिएको क्रसपासमा गोल गरेर टिमलाई अघि बढाएका थिए ।
त्यसपछि पनि लिभरपुलले वाटफोर्डमाथि निरन्तर दबाब सिर्जना गरेको थियो । पहिलो हाफको ३७औं मिनेटमा रोबर्टो फर्मिनोले लिभरपुलका लागि दोस्रो गोल गरे । फर्मिनोले ५२ र ९१ औं मिनेटमा पनि अरु दुई गोल गरी ह्याटिक पूरा गरेका थिए ।
लिभरपुलका लागि मोहम्मद सलाहले ५४औं मिनेटमा एक गोल गरे ।
यस खेलमा १९ पटक लिभरपुलले वाटफोर्डको पोस्टमा प्रहार गरेको थियो । खेलमा ७७ प्रतिशत बल लिभरपुलले नियन्त्रणमा राखेर वाटफोर्टमाथि दबाब बनाएको थियो ।
यो जितसँगै ८ खेलबाट लिभरपुलले १८ अंक बनाएर शीर्ष स्थानमा उक्लिएको छ ।
आजै म्यान्चेस्टर युनाइटेड, म्यान्चेस्टर सिटी, लेस्टर सिटीका खेलहरु रहेका छन् ।
