काठमाडौं। राष्ट्रपति विद्यादेवी भण्डारीले अविरल वर्षाका कारण धानबालीमा क्षति ब्यहोरेका किसानलाई राहत र क्षतिपूर्ति दिन आग्रह गर्नु भएको छ । राष्ट्रपति कार्यालयले बिहिबार एक बिज्ञप्ति जारी गर्दे प्रकोपबाट कृषिक्षेत्र खासगरी धान बाली र विविध भौतिक पूर्वाधारको विनाशको सन्दर्भमा राहत, क्षतिपूर्ति र पुनर्निर्माण सम्बन्धमा समन्वयात्मक रुपमा अघि बढ्न आग्रह गर्नुभएको हो ।
बिज्ञप्तिमा राष्ट्रपति भण्डारीले सम्पूर्ण राजनीतिक दल, सामाजिक संघसंस्था र समुदायलाई आवश्यक समन्वय र सहकार्यसहित पीडितहरुको उद्धार तथा राहत कार्यमा संलग्न हुन आग्रह गर्नुभएको छ । उहाँले भविष्यमा आइपर्ने प्राकृतिक प्रकोपबाट जोगिन नागरिकलाई सचेत हुन आग्रह समेत गर्नुभएको छ ।
राष्ट्रपति भण्डारीले हालै अविरल बर्षाका कारण मुलुकका बिभिन्न भागमा आएको बाढी, पहिरो र डुवानले भएको जनधनको ठुलो क्षतिप्रति गहिरो दुःख समेत व्यक्त गर्नुभएको छ । विज्ञप्ती मार्फत राष्ट्रपति भण्डारीले भन्नुभएको छ, ‘विपदको यस दुखद घडीमा प्रकोप पीडितहरुको उद्धार तथा व्यवस्थापन, घाइतेको उपचार, राहत वितरण, बेपत्ताको खोजीकार्यमा लाग्न आग्रह गर्दछु ।’
उहाँले प्राकृतिक विपदको यो घडीमा शोक सन्तप्त पीडित सबै प्रति हार्दिक समवेदना र सहानुभूति राख्दै विपत्तिबाट बच्न सवैले सावधानी अपनाउन सुझाब दिनुभएको छ ।
