सडक विस्तारलगायतका कार्यमा सहजीकरण गर्न राजधानीका विभिन्न स्थानमा आज विद्युत कटौती गरिने भएको छ । बालाजु सवस्टेशनबाट विद्युत्त आपूर्ति हुँदै आएका क्षेत्रहरुमा आज केही घण्टा लोडसेडिङ हुने भएको हो ।
नेपाल विद्युत प्राधिकरणका अनुसार वनस्थली चोकदेखि बालाजु प्रहरी चौकीसम्मको सडक विस्तारको लागि विद्युत आपूर्ति बन्द गरिएको हो । प्राधिकरणका अनुुसार आज बिहान ८ बजेदेखि दिउँसो ३ बजेसम्म विद्युत्तभार कटौती हुनेछ । जसका कारण पुरानो गुहेश्वरी, फूलबारी गेट, मुड्खु, बतासे डाँडा, धितालथोक, तिनपिप्ले, जरंखु, नेपालटार, मनमैजु, फुटुङ, जितपुर हुँदै छत्रेदेउरालीसम्मको भागमा विद्युत् आपूर्ति बन्द भएको छ ।
प्राधिकरण अन्तर्गतको वितरण केन्द्रले बालाजु–नागार्जुन फिडरबाट आपूर्ति हुने जनजागृति, रोटरी क्लब, टौडोल, शीतला स्कुल, रानीवन, बुद्धचोक, राधाकृष्ण हुँदै एकलटार क्षेत्रमा पनि दिउँसो ३ बजेसम्म लोडसेडिङ हुने जनाएको छ ।
