काठमाडौं, १८ मंसिर । गोरखा भूकम्पको केन्द्रविन्दु बारपाक जोड्ने बारकिलो–बारपाक सडकमा पर्ने जापान सरकारले निर्माण गरेका पाँचवटा पुल गोरखामा आयोजित एक समारोहबीच हस्तान्तरण गरिएको छ । उक्त समारोहको प्रमुख अतिथि भौतिक पूर्वाधार तथा यातायात मन्त्री रघुबिर महासेठ हुनुहुन्थ्यो ।
समारोहमा नेपालका लागि जापानका राजदूत मासामिची साइगो र जाइका नेपालका नवनियुक्त प्रमुख युमीको आसाकुमा पनि उपस्थित हुनुहुन्थ्यो ।
सन् २०१५ को डिसेम्बरमा दुई सरकारबीच गोरखामा पुनर्निर्माणका अन्य कार्यक्रम सहित तीनवटा पुल बनाउने गरी सम्झौता भएको थियो । गोरखाका उत्तरी भागसम्म यातायातलाई सहज बनाउन यी पुलहरुको महत्वपूर्ण योगदान रहनेछ । गत जुलाई २०१८ मा निर्माण सम्पन्न भएका पुलहरुमा दरौंदी खोला पुल, घट्टे खोला पुल र राङरुङ खोला पुल रहेका छन् ।
यसबाहेक, खहरे खोला पुल र झ्याल्ला खोला पुल पनि जाइकाको अर्को प्राविधिक सहयोग मार्फत निर्माण गरिएका हुन् ।
उक्त कार्यक्रममा राजदूत साइगोले नयाँ पुलको निर्माणले आवागमनमा सहजता आउने र बजारको पहुँच बढ्ने विश्वास व्यक्त गर्नुभयो । साथै, गोरखाका उत्तरी क्षेत्रको आर्थिक कृयाकलापमा सुधार ल्याउन थप मद्दत पुग्ने राजदूत साइगोले बताउनुभयो । उहाँले यस परियोजना मार्फत नेपाल र जापानबीचको मैत्री सम्बन्ध अझ प्रगाढ हुने विश्वास व्यक्त गर्नुभयो ।
जाइकाका नेपाल प्रमुख आसाकुमाले पनि नेपालमा भूकम्पपछिको पुनरुद्धारका कार्यमा जापानको सहयोग निरन्तर रहने प्रतिबद्धता व्यक्त गर्नुभयो । उहाँले भूकम्प प्रभावित क्षेत्र र समुदायमा दिर्घकालीन दिगो विकासका लागि नयाँ ऊर्जा, स्रोत र कार्यक्रम ल्याउने बताउनुभयो ।
जापान सरकारले प्रदान गरेको सहयोगबाट निर्मित पूर्वाधारका कारण स्थानीयवासीलाई यातायात र आवागमनमा ठूलो मद्दत पुगेको छ ।
स्थानीयवासीले यी पुललाई “जापानी पुलहरु” भन्न रुचाएको पाइएको छ । उक्त पुलहरु नेपाल र जापानबीचको मित्रताको चिनोको रुपमा रहने छ ।
