कठमाडौं, २६ मंसिर । नेपालका लागि जापानका राजदूत मासामिची साइगोले धादिङ जिल्लाको रुबी उपत्यका गाउँपालिकास्थित च्यामरादेवी माध्यमिक विद्यालयको नवनिर्मित भवनको बुधबार उदघाटन गर्नुभयो ।
उक्त विद्यालय २०७२ सालको विनाशकारी भूकम्पबाट क्षतिग्रस्त भएको थियो ।
जापान सरकारको करिब ९२ लाख रुपैयाँको सहयोगमा उक्त विद्यालयको पुनर्निर्माण गरिएको नेपालस्थित जापानी राजदूतावासले जनाएको छ ।
च्यामरादेवी माध्यमिक विद्यालयमा हाल ४०७ जना बालबालिका अध्ययनरत छन् । भूकम्पका कारण ठूलो क्षति भएका कारण विद्यार्थीहरुले खुला आकाशमुनि र अस्थायी टहरामा बसेर अध्ययन गरिरहेका थिए ।
नयाँ विद्यालय भवन निर्माण भएपछि विद्यार्थीको पठनपाठनमा ठूलो सहयोग पुगेको राजदूत मासामिचीले बताउनुभयो । नवनिर्मित उक्त विद्यालय भूकम्प प्रतिरोधी, सुविधाजनक र सुरक्षित अध्ययन स्थल बनेको छ ।
दूतावासका अनुसार नेपाल र जापानको सम्बन्धलाई जनस्तरमा विस्तार गर्न उक्त सहयोग कोशेढुंगा सावित हुनेछ ।
