रोल्पा । रोल्पाका ७२ मध्ये २२ वडामा आधारभूत स्वास्थ्य सेवाको समेत अभाव छ । २२ वडामा सामान्य स्वास्थ्य सेवा उपलब्ध हुने स्वास्थ्यचौकी समेत नहुँदा स्थानीयवासी घन्टौँ पैदल हिँडेर उपचार सेवा लिन बाध्य छन् । संघीयता कार्यान्वयनमा आएपछि घर–आँगनमै शिक्षा, स्वास्थ्यलगायतका सेवा उपलब्ध हुने भनिए पनि रोल्पाका हजारौँ नागरिक आधारभूत स्वास्थ्य सेवाबाटसमेत वञ्चित हुँदै आएका छन् ।
राज्य पुनर्संरचना गर्दा साबिकका ४९ गाविस र नगरपालिकालाई समायोजन गरेर ७२ वडा कायम गरिएको थियो । स्थानीय तह कार्यान्वयनमा आए पनि साबिक ४९ गाविसमा मात्रै स्वास्थ्य संस्था कायम छन् । जिल्ला स्वास्थ्य कार्यालय रोल्पाका मेडिकल सुपरिटेन्डेन्ट डा। सुशील आचार्यले कायम भएका नयाँ २२ वडामा स्वास्थ्यचौकी सञ्चालन हुन नसकेको बताए । स्वास्थ्यचौकी नभएका वडाका नागरिक आफूलाई पायक पर्ने वडामा रहेका स्वास्थ्य संस्थाबाट सेवा लिइरहेका छन् ।
पूर्वाधार र जनशक्ति अभाव
जिल्लामा मध्यमस्तरको स्वास्थ्य सेवा दिने जिल्ला अस्पतालमा समेत आवश्यक पूर्वाधार र जनशक्ति अभाव छ । सदरमुकाम लिबाङमा रहेको जिल्ला अस्पतालमा १५ बेड मात्रै स्वीकृत भए पनि २१ बेडमा सेवा सञ्चालन गरिएको डा। आचार्यले जानकारी दिए । ‘गर्भवतीका लागि पाँचवटा छुट्टै बेडसहित २६ बेडको सेवा दिएका छौँ’ आचार्यले भने, ‘आवश्यक स्वास्थ्य उपकरण, भवन तथा स्वास्थ्यकर्मीको अभाव उस्तै छ ।’
सुलीचौर र होलेरीमा रहेका प्राथमिक स्वास्थ्य केन्द्रको अवस्था पनि सन्तोषजनक छैन । यहाँ पनि उपकरण, भौतिक पूर्वाधार र जनशक्तिको अभाव छ । स्वास्थ्य संस्थामा भौतिक पूर्वाधार र जनशक्तिका लागि आफूले पहल गरिरहेको जिल्ला समन्वय समिति रोल्पाका प्रमुख राजबहादुर बुढाले बताए । ‘जिल्लाको एक मात्र अस्पतालको स्तरवृद्धि गर्दै जनतालाई स्वास्थ्य सेवा प्रवाह गर्ने क्षमता विकास गर्न लागिपरेका छौँ’, बुढाले भने । जिल्लाका सबै वडामा स्वास्थ्यचौकी स्थापना गर्न आफूले समन्वयात्मक भूमिका खेलिरहेको उनको भनाइ छ ।
१७ स्थानमा सामुदायिक स्वास्थ्य क्लिनिक
जिल्लाका १७ स्थानमा सामुदायिक स्वास्थ्य क्लिनिक सञ्चालन गरी आधारभूत स्वास्थ्य सेवा प्रवाह गरिएको जिल्ला स्वास्थ्य कार्यालय रोल्पाले जनाएको छ । ‘स्थानीय सरकारको इच्छाशक्ति भए स्वास्थ्य संस्था नभएका सबै वडामा तत्कालका लागि सामुदायिक स्वास्थ्य क्लिनिक स्थापना गरेरै भए पनि सेवा दिन सकिन्छ’, डा. आचार्यले भने ।
नयाँ पत्रिका दैनिकमा खबर छ ।
