काठमाडौँ । अन्तर्राष्ट्रिय मैत्रीपूर्ण फुटबलमा आज अर्जेन्टिनाले भेनेजुयलाको सामना गर्दै छ । यहि खेलबाट बार्सिलोना तथा अर्जेन्टिनाका कप्तान लियोनल मेस्सी ९ महिनापछि मैदानमा देखिने छन् ।
स्पेनको क्लब एथ्लेटिको मड्रिडको घरेलु रंगशालामा वान्डा मेट्रापोलिसानो स्टेडियममा हुने खेल नेपाली समयअनुसार राति १ः४५ बजेबाट सुरु हुने छ ।
सन् २०१८ को रसिया विश्वकपमा अर्जेन्टिना अन्तिम १६ मा फ्रान्ससँग ४–३ ले पराजित हुँदै बाहिरिएपछि मेस्सी राष्ट्रिय टोलीबाहिर रहँदै आएका थिए । उनले विश्वकपपछि ६ अन्तर्राष्ट्रिय खेल गुमाएका छन् । यसै वर्ष हुने कोपा अमेरिका फुटबलको पूर्वसन्ध्यामा उनी राष्ट्रिय टोलीमा फर्किएका हुन् ।
रष्ट्रिय टोलीका कप्तानसमेत रहेका मेस्सी लामो समयपछि टोलीमा फर्किने भएकाले आजको खेल रोचक हुने सम्भावना रहेको छ ।
आजको खेलपछि अर्जेन्टिनाले दोस्रो खेल मोरक्कोसाँग आगामी मंगलबार खेल्दैछ । तर, मेस्सी भने पहिलो खेलमा मात्रै सामेल हुनेछन् ।
३१ वर्षिय मेस्सीले अर्जेन्टिनाबाट १ सय २८ खेल खेल्दै ६५ गोल गरेका छन्। उनि राष्ट्रिय टोलीमा फर्कने भएपछि अर्जेन्टिनाका प्रशिक्षक लियोनल स्कालोनीले खुशी व्यक्त गरेका छन्।
