दोलखा । उत्तरी दोलखाको गौरीशंकर गाउँपालिकाको पहिरोमा परि एक दम्पत्ति गम्भीर घाइते भएका छन्। घाइते हुनेमा गौरीशंकर गाउँपालिका–८, छेसाखारेका करिब ५५ वर्षीय धनबहादुर मगर र उनकी श्रीमती करिब ५० वर्षीया गोरीमाया मगर रहेका छन् ।
शनिबार घाँस काट्न गएका बेला उनिहरुलाई करिब ५० मिटर माथिबाट खसेको पहिरोबाट उछिट्टिएको ढुंगाले लागेको थियो । उनीहरूको सदरमुकाम चरिकोटस्थित प्राथमिक स्वास्थ्य केन्द्रमा उपचार हुन नसकेर हेलिकप्टरमार्फत काठमाडौं रेफर गरिएको दोलखा प्रहरीका प्रवक्ता प्रहरी निरीक्षक रेशम बोहराले जानकारी दिए ।
धनबहादुरको टाउकोमा र गोरीमायाको शरीरभर चोट लागि अचेत रहेको स्वास्थ्यकर्मीले बताएका छन्।घटनास्थल सदरमुकाम चरिकोटबाट करिब ६२ किलोमिटर उत्तरमा पर्छ।
