काठमाडौं । एथ्लेटिको मड्रिडबाट बार्सिलोनामा हालै अनुबन्ध भएका स्टार खेलाडी एन्टोनी ग्रिजम्यानले आफू कल्बका कप्तान मेस्सीसँग खेल्न आतुर रहेको बताएका छन् ।
बार्सा टिभीसँगको कुराकानीमा उनले आफू मेस्सीसँग खेल्न आतुर रहेको बताएका हुन् । सोहि क्रममा उनले मेस्सीसँग कसैसँग नभएको अनौठो फुटबल कला भएको बताए। ‘मेस्सी अन्य खेलाडी भन्दा केही फरक छन् ।,’ ग्रिजम्यानले भने, ‘मेस्सीले त्यो काम गरेर देखाएका छन् जो अन्य खेलाडीले गर्न सकेका छैनन् ।’
ग्रिजम्यानले मेस्सी आफ्नो लागि एक नम्बर समेत रहेको बताए । ‘मेस्सी फुटबलका नं एक हुन्, जस्तै लेब्रोन जेम्स बास्केटबलका नं एक हुन्।’,उनले भने ‘उनीहरु फुटबल र बास्केटबलका इमेज हुन् ।’
ग्रिजम्यानलाई बार्सिलोनाले एक सय २० मिलियन युरोमा अनुबन्धन गरेको हो । २८ बर्षीय ग्रिजम्यानले बार्सिलोनासँग पाँच बर्षको सम्झौता गरेका छन् ।
फ्रान्सलाई विश्वकप जिताउँदाका नायक उनी सन् २०१४ मा रियल सोसिडाडबाट एट्लेटिको म्याड्रिड गएका थिए । एट्लेटिमा रहदाँ उनले दुई सय ५६ खेल खेल्दै एक सय ३३ गोल गरेका छन् । एट्लेटिकोसँगको पाँच बर्षे सम्झौता सकिएका कारण उनले समरमा क्लब छाड्ने घोषणा गरेका थिए ।
