काठमाडौं । कमल थापा नेतृत्वको राष्ट्रिय प्रजातन्त्र पार्टीले रुपन्देहीको तिलोत्तमा नगरपालिकास्थित सिद्धार्थ राजमार्गमा भएको भगवान बुद्धको मूर्ति तोडफोडको घटनाले मर्माहत बनाएको जनाएको छ ।
आज सो पार्टीका बरिष्ठ उपाध्यक्ष बुद्धिमान तामाङले एक विज्ञप्ति जारी गरी सो घटनाले सम्पूर्ण नेपालीहरुलाई मर्माहत बनाएको बताएका हुन् । ‘नेपालको मौलिक मान्यता र परम्परालाई निरन्तरता दिँदै स्थापना भएका भगवान गौतम बुद्धका शालिकहरु अज्ञात समूहले तोडफोड गरेको खवरले सर्वधर्म समभावको विचार राख्ने सम्पूर्ण नेपालीहरु मर्माहत हुनु स्वभाविक हो,’विज्ञप्तिमा भनिएको छ ।
धार्मिक, सामाजिक र साँस्कृतिक सद्भाव भड्काउने कार्यमा संलग्न अपराधी व्यक्तिलाई कानुनी दायरामा ल्याई कडाभन्दा कडा कार्वाही गर्न समेत विज्ञप्तिमा माग गरिएको छ ।
केही दिनअघि अज्ञात समूहले सिद्धार्थ राजमार्गमा रहेको बुद्धको मुर्ति तोडफोड गरेको थियो । सो घटनाको चौतर्फी रुपमा विरोध हुँदै आएको छ ।