काठमाडौं । मानवीय स्वास्थ्यमा प्रोटिनको मात्राको महत्व र आवश्यकताबारे राजधानीमा शुक्रबार एक विशेष कार्यक्रमको आयोजना गरिएको छ ।
अमेरिकाको सिबर्न एक्सपर्ट काउन्सिल र गण्डकी बोर्डिङ स्कुल एलुमुनाई एसोसिएनद्धारा राजधानीको अन्नपूर्ण होटलमा आयोजना गरिएको सो कार्यक्रमका सहभागी चिकित्सकहरुले मानव स्वास्थ्यका लागि प्रोटिनको महत्व र आवश्यकतामाथि प्रकाश पारेका थिए ।
सो कार्यक्रममा गण्डकी बोर्डिङ स्कुलका विद्यार्थी र उनीहरुका परिवार समेत गरी २५० जनाको सहभागिता रहेको थियो । उनीहरुमार्फत मानव स्वास्थ्यमा प्रोटिनको मात्राको बारेमा जानकारी दिन सो कार्यक्रम प्रभावकारी हुने आयोजकहरुले बताएका छन् ।
सो कार्यक्रममा गण्डकी बोर्डिङ स्कुल एलुमुनाई एसोसिएन, काठमाडौँका अध्यक्ष डा.सुजिता हिराचनले सो कार्यक्रमका सहभागी तथा समग्र नेपाली नागरिकलाई आफ्नो दैनिक खानपिनमा प्रोटिनको मात्रामा ख्याल गर्न आग्रह गरिन् ।
उनले प्रोटिनको महत्वका विषयमा विद्यालयका पाठ्यक्रमहरुमा पनि व्यवस्था गर्नुपर्नेमा नेपाल सरकार तथा सबै सरोकारवालाहरुको ध्यानाकर्षण पनि गराएकि थिइन् ।
त्रिभुवन विश्वविद्यालय शिक्षण अस्पतालका नानीशोभा शाक्यले प्रोटिनको महत्वमाथि प्रकाश पार्दै नागरिकले आफ्नो स्वास्थ्यमा यसको आवश्यकता बुझ्न आग्रह गरिन् ।
सो कार्यक्रममा सहभागी युएसएसइसका डा.पवनकुमारले खानामा प्रोटिनका स्रोतहरु के के हुन् भन्ने जानकारी दिएका थिए । उनले हरेक व्यक्तिले एक दिनमा के कति प्रोटिन चाहिन्छ भन्ने जानकारी राखेर प्रोटिनको मात्रा पुराएर खानुपर्नेमा जोड दिए ।
गण्डकी बोर्डिङ स्कुल एलुमुनाई एसोसिएन, काठमाडौँका उपाध्यक्ष डा.शीतलकाजी श्रेष्ठले मानिस आफ्नो स्वास्थ्यको पहिलो डाक्टर आफै हो भन्दै सबैले प्रोटिन दूतका रुपमा काम गर्न आग्रह गरे ।
पोखराको गण्डकी बोर्डिङ स्कुलमा पढेका पूर्व विद्यार्थीहरुको यस संस्थाले देशका विभिन्न क्षेत्रमा छात्रबृत्ति दिने, स्वास्थ्य क्याम्पहरु राख्ने तथा विद्यार्थीहरुलाई विभिन्न विषयमा परामर्श गर्ने लगायतका काम गर्ने गर्दछ ।