निर्माता छविराज ओझा र अभिनेत्री शिल्पा पोखरेलबीच डिभोर्सको चर्चा चलिरहेको समयमा यी दुबै विरुद्ध बहुविवाहको उजुरी परेको छ ।
निर्माता ओझाकी जेठी पत्नी हेमा ओझाले वहुविवाहको उजुरी दिएसँगै नयाँ ट्विष्ट आएको हो ।प्रहरी वृत्त गौशालामा उनले दिएको उजुरीमा छवि र शिल्पालाई विपक्षी बनाइएको छ ।
‘शिल्पा पोखरेलसँग सम्बन्धको विषयमा पटक–पटक सम्बन्धको हल्ला चल्दा कामको सिलसिलामा मात्र हो भन्ने जवाफको विश्वास गरेको थिए’ हेमाले दिएको जाहेरीमा अगाडि लेखिएको छ ‘अहिले दुबैको २०७५ साल पौष ११ विवाह दर्ता भएको प्रमाणपत्र फेला परेको छ’, जाहेरीमा लेखिएको छ ।
पछिल्लो समय शिल्पा र छविको विवाह दर्ताको कागजात हात पारेको भन्दै उनले भनेकी छन्, ‘मेरा पति छविराज ओझा र शिल्पा पोखरेललाई प्रचलित कानुन बमोजिम यथासक्य चाँडो नियन्त्रणमा लिई कारवाही प्रक्रिया अघि बढाई अनुसन्धान गरी निजहरुलाई कानुन बमोजिम हदैसम्म सजाउ गरिपाउँ ।’
गौशालाका डीएसपी प्रदिपबहादुर सिंहले हेमा उजुरी लिएर प्रहरी वृत्तमा आएको भएपनि दर्ता भइनसकेको बताए । उनले भने–‘हामी यसलाई पुष्टि गर्दैछौं । आवश्यक परे दर्ता हुन्छ ।’
