काठमाडौं । सोसाइटी अफ मोडर्न आर्टिष्ट (सोमा)को आयोजनामा आगामी भदौमा चित्रकला प्रदर्शनी हुने भएको छ । नेपाल कला परिषद्मा भदौ ५–९ सम्म हुने ‘कलापुञ्ज–६’ मा लैनसिंह बाङ्देलका शिष्यहरुको चित्रकला प्रदर्शनी हुने सोमाका सदस्य जीवन राजोपाध्यायले जानकारी दिनुभयो ।
प्रदर्शनीमा चिनीकाजी ताम्राकार, शङ्करनाथ रिमाल, शङ्करराजसिंह सुवाल, हेम पौडेल, गोविन्द डङ्गोल, श्यामलाल श्रेष्ठ, हरि खड्का, जीवन राजोपाध्याय, नरेशसुन्दर संैँजुृ, टार्जन साङ्पाङ, रत्नकाजी शाक्य, रमाराज मास्के र कान्ति न्यौपाने तथा दिवङ्गत हीरालाल डङ्गोल, कर्ण मास्के र शान्तकुमार राईका चित्र रहनेछन् । विसं २०६४ मा स्थापित सोमाले यसअघि पाँच प्रदर्शनी सम्पन्न गरिसकेको छ ।
प्रदर्शनीकै क्रममा डा यामप्रसाद शर्माद्वारा कलाकारका व्यक्तित्व र चित्रकारिता समेटी तयार गरिएको पुस्तक विमोचन हुनाका साथै कलाकार र कला विकासमा योगदान दिने दुई व्यक्तिलाइ जनही रु १० हजारका साथ ‘लैनसिंह बाङ्देल सम्मान’ दिइने जनाइएको छ । नेपालमा आधुनिक चित्रकलालाई बाङ्देलले नै स्थापित गरेको मान्यता छ ।
