काठमाडाैः नेपाल राष्ट्र बैंकले लागू गरेको उमेर हदका कारण पुनर्नियुक्ति पाएको चार दिनमै प्राईम बैंकको प्रमुख कार्यकारीबाट हट्न बाध्य भएका नारायणदास मानन्धरले नेपाल राष्ट्र बैंक विरुद्ध मुद्दा हालेका छन् ।
मानन्धरले राष्ट्र बैंक समेतलाई विपक्षी बनाएर साउन २२ गते उत्प्रेषणसम्बन्धी रीट दर्ता गराएका हुन् । रीटमा राष्ट्र बैंकले प्रमुख कार्यकारी र संचालकहरुलाई उमेर हद लगाई बैंकको जिम्मेवारी बहन गर्नबाट बाधा सिर्जना गर्ने निर्देशन खारेजीको माग गरिएको छ ।
मानन्धरले हालेको रीट बिहीबार न्यायाधीश मीरा खड्काको बेन्चमा परे पनि हेर्न नभ्याईने सूचीमा परेर कुनै सुनुवाई हुन सकेन ।
राष्ट्र बैंकले गत साता एकीकृत निर्देशन जारी गरी ६५ बर्ष उमेर पूरा भएको ब्यक्ति बैंकको कार्यकारी हुन नसक्ने र ६९ बर्ष पुरा गरेको ब्यक्ति बहाल रहन नसक्ने ब्यवस्था गरेपछि प्राईम बैंकको तेस्रो पटक कार्यकारी बनेका मानन्धर पदमुक्त भएका थिए ।
राष्ट्र बैंकले बैंकका संचालक हुन ७० बर्ष उमेर पुरा भएको ब्यक्ति बैंकको संचालकमा बस्न नपाउने र ७४ बर्ष पुरा भएको ब्यक्ति पदमा बहाल नरहने ब्ब्यवस्था गरेको छ । यो व्यवस्थाका कारण नबिल बैंकका अध्यक्ष शम्भु पौडेल र एभरेष्ट बैंकका अध्यक्ष बीके श्रेष्ठ पनि पदमुक्त भएका छन् ।
