काठमाडौं । सवारी साधन दर्ता प्रक्रियामा देखिएका समस्याका सम्बन्धमा काठमाडौं जिल्ला प्रशासन कार्यालय र नेपाल अटोमोबाइल्स एसोसिएसन (नाडा) बीच छलफल भएको छ ।
नाडाका महासचिव मिलनबाबु मल्लको नेतृत्वमा गएको प्रतिनिधिमण्डलले काठमाडौंका प्रमुख जिल्ला अधिकारी ईश्वरराज पौडेलसँग भेट गरी सवारी साधन दर्ताका क्रममा देखिएका समस्याबारे विस्तृत छलफल गरेको हो ।
छलफलका क्रममा महासचिव मल्लले चाडपर्वको समय नजिकिँदै जाँदा यातायात व्यवस्था कार्यालयहरूमा सवारी साधन दर्तासम्बन्धी कामको चाप बढेको, तर कार्यालयमा उपलब्ध जनशक्ति सीमित हुँदा सेवाग्राही तथा कम्पनीका प्रतिनिधिको काम समयमा सम्पन्न गर्न कठिनाइ भइरहेको बताउनुभयो ।
कम्पनीका प्रतिनिधिहरूले आवश्यक कागजात पेस गर्ने तथा सवारी साधन दर्तासम्बन्धी आवश्यक कार्यमा सहजीकरण गरिरहेको भए पनि कार्यालयको नियमित प्रक्रिया र कर्मचारीको कार्यचापका कारण काम सम्पन्न हुन अपेक्षाकृत बढी समय लाग्ने गरेको नाडाले जनाएको छ । समस्या तत्काल समाधान तथा समन्वयका लागि नाडाले प्रशासनसँग आग्रह गरेको छ ।
सोही क्रममा नाडाका सचिव तथा टू–ह्विलर समितिका सभापति मेघराज पौडेलले असोज ८ गते यातायात व्यवस्था कार्यालयका प्रमुख राजन पोखरेलसँग नाडाका प्रतिनिधिहरूले भेट गरी उक्त समस्याको समाधानका लागि छलफल गरिसकेको जानकारी दिनुभयो ।
छलफलकोमा प्रमुख जिल्ला अधिकारी पौडेलले सवारी साधन दर्तासम्बन्धी समस्या समाधानका लागि सम्बन्धित यातायात व्यवस्था कार्यालयहरूसँग आवश्यक छलफल तथा समन्वय गरिने बताउनुभयो ।
भेटवार्तामा नाडा केन्द्रीय कार्यसमिति सदस्य विमल साह, नाडा टू–ह्विलर समितिका सदस्य योगेन गुरुङ तथा दीपक रौनियारलगायतको सहभागिता रहेको थियो।
