काठमाडौं । सरकारले वैदेशिक रोजगारीलाई बाध्यताबाट विकल्पमा रूपान्तरण गर्ने लक्ष्यसहित स्वदेशमै रोजगारीका अवसर विस्तार गर्ने अभियानलाई तीव्रता दिएको छ ।
आर्थिक वर्ष २०८३/०८४ को नीति तथा कार्यक्रममा घोषणा गरिएको ‘रोजगार प्रवर्द्धन दशक (२०८३–२०९२)’लाई व्यवहारमा कार्यान्वयन गर्न सरकारले विभिन्न कार्यक्रम अघि बढाएको हो ।
युवा जनशक्तिको ऊर्जा, ज्ञान, सीप र क्षमतालाई स्वदेशमै उपयोग गर्ने वातावरण निर्माण गर्ने नीतिअनुसार युवा, श्रम तथा रोजगार मन्त्रालयले असोज १४ देखि २० गतेसम्म कोशी प्रदेशको इटहरीमा सात दिने ‘सीप तथा रोजगार मेला’ आयोजना गर्ने भएको छ ।
सरकारले यस अभियानलाई क्रमशः देशभर विस्तार गर्ने उद्देश्यले ‘सीप तथा रोजगार मेला सञ्चालन निर्देशिका, २०८३’ जारी गरिसकेको छ । निर्देशिकाअनुसार मेलालाई व्यवस्थित र प्रभावकारी बनाउन श्रममन्त्रीको संयोजकत्वमा निर्देशन तथा समन्वय समिति गठन गरिएको छ ।
प्रदेश सरकार, स्थानीय तह तथा जिल्ला प्रशासनसँगको सहकार्यमा मेलाको व्यवस्थापन अघि बढाइएको मन्त्रालयले जनाएको छ ।
मेलामा निजी क्षेत्र, उद्योग तथा प्रतिष्ठान, तालिम प्रदायक संस्था, विकास साझेदार, सामाजिक सुरक्षा कोषलगायतका संस्थाका स्टल रहनेछन् । मेलामार्फत रोजगारदाताको वास्तविक जनशक्ति माग पहिचान गरी रोजगारी खोजिरहेका युवालाई उनीहरूको योग्यता, सीप र रुचिअनुसार उपयुक्त रोजगारीसँग जोड्ने लक्ष्य राखिएको छ ।
त्यस्तै, मेलामा सीप परीक्षण, आवश्यकताअनुसार तालिम, करियर परामर्श तथा उद्यमशीलतासम्बन्धी सेवासमेत उपलब्ध गराइनेछ ।
सरकारले ‘रोजगार प्रवर्द्धन दशक’मार्फत स्वदेशमै रोजगारीका अवसर सिर्जना तथा विस्तार गर्ने र युवाको सीप तथा श्रमलाई देशभित्रै उपयोग गर्ने नीतिलाई प्राथमिकतामा राखेको छ ।इटहरीबाट सुरु हुने सीप तथा रोजगार मेलालाई क्रमशः अन्य प्रदेश तथा स्थानीय तहमा विस्तार गर्ने सरकारको तयारी छ ।
