काठमाडौं । प्रधानमन्त्री वालेन्द्र शाह र न्यूजिल्यान्डका प्रधानमन्त्री क्रिस्टोफर लक्सनबीच आज टेलिफोन वार्ता भएको छ।
वार्ताका क्रममा प्रधानमन्त्री शाहले रसुवाको भोटेकोशीमा आएको विनाशकारी बाढीपछि खोज, उद्धार, राहत तथा पुनःस्थापनाका कार्यलाई तीव्रता दिइएको जानकारी गराउनुभयो। उहाँले बाढीमा बेपत्ता भएका सबै नागरिकको खोजी कार्यलाई सरकारले उच्च प्राथमिकतामा राखेको बताउनुभयो।
प्रधानमन्त्री शाहले विपद्पछिको मानवीय सहयोगका लागि न्यूजिल्यान्ड सरकारले उपलब्ध गराएको २० लाख न्यूजिल्यान्ड डलर बराबरको सहयोगप्रति कृतज्ञता व्यक्त गर्नुभयो।
नेपाल जलवायुजन्य विपद्का दृष्टिले उच्च संवेदनशील राष्ट्र रहेको उल्लेख गर्दै प्रधानमन्त्री शाहले अन्तर्राष्ट्रिय मञ्चहरूमा क्षति तथा नोक्सानीका लागि वित्तीय सहयोग जुटाउने प्रयासमा न्यूजिल्यान्ड सरकारको रचनात्मक सहयोगका लागि आग्रह गर्नुभयो।
टेलिफोन वार्ताका क्रममा न्यूजिल्यान्डका प्रधानमन्त्री लक्सनले नेपालमा गएको विनाशकारी बाढीप्रति न्यूजिल्यान्ड सरकार तथा जनताको तर्फबाट हार्दिक समवेदना र ऐक्यबद्धता व्यक्त गर्नुभयो। उहाँले विपद्को यस कठिन अवस्थामा नेपालप्रति न्यूजिल्यान्डको समर्थन रहेको सन्देश दिनुभयो।
