काठमाडौँ । नेपाली काँग्रेसका सांसद अर्जुननरसिंह केसीले जेन–जी युवा पुस्ताले परिकल्पना गरेको समाज निर्माण गर्न सफल भए–नभएको विषयमा गम्भीर समीक्षा गर्नुपर्ने बताउनुभएको छ ।
प्रतिनिधि सभाको बुधवारको बैठकमा बोल्दै सांसद केसीले गत वर्ष भएको जेन–जी आन्दोलन सरकार परिवर्तनका लागि नभई राज्य सञ्चालनको संस्कार र सरकारको शैली परिवर्तनका लागि भएको बताउनुभयो ।
उहाँले जेन–जी आन्दोलन कुनै दल विशेषको आन्दोलन नभएको उल्लेख गर्दै आन्दोलनको मर्मअनुसार मुलुकमा विद्यमान दण्डहीनता र विधिविहीनताको अन्त्य गर्नुपर्नेमा जोड दिनुभयो ।
सांसद केसीले जेन–जी पुस्ताले परिकल्पना गरेको राज्य र समाज निर्माण गर्न आफूहरू सफल भए–नभएको विषयमा गम्भीर हुनुपर्ने बताउनुभयो ।
उहाँले भन्नुभयो, ‘जेन–जी आन्दोलन कुनै दल विशेषको थिएन । यो आन्दोलन सरकार परिवर्तनको लागि नभई संस्कार परिवर्तनको लागि थियो । सरकारको शैली परिवर्तनको लागि थियो । मुलुकमा विद्यमान दण्डहीनता र विधिविहीनताको अन्त्यको लागि थियो । जुन राज्य र समाज जेनजी पुस्ताले परिकल्पना गरेको थियो । वास्तवमा हामीले त्यो पूरा गर्न सकेका छौँ कि छैनौँ ? त्यतातिर गम्भीर हुनुपर्ने आवश्यकता छ ।’
सांसद केसीले अहिले मुलुकमा मल र ग्यासको अभाव देखिएको भन्दै सरकारको ध्यानाकर्षणसमेत गराउनुभयो । उहाँले चारैतिर हाहाकारको अवस्था देखिएको उल्लेख गर्दै यस्ता समस्या समाधानका लागि सबै पक्ष एकै ठाउँमा उभिनुपर्ने बताउनुभयो ।
प्राकृतिक विपद्को सामना गर्न पनि सबै एकजुट हुनुपर्ने उहाँको भनाइ थियो । रसुवाको भोटेकोशीमा आएको बाढीपछि उद्धारमा केही कमजोरी भए पनि सरकारले गरेको कामलाई राम्रो मान्नुपर्ने बताउँदै उहाँले टनेलमा फसेका नागरिकको उद्धारमा भने थप सुधार र प्रभावकारिता आवश्यक रहेको बताउनुभयो ।
‘अहिले चारैतिर हाहाकारको स्थिति छ । मलको हाहाकार, ग्यासको हाहाकार । तर अहिले यो समयमा हामी सबै एकै ठाउँमा उभिएर अहिले हामी सामु देखिएका समस्या समाधान गर्नुपर्ने आवश्यकता छ,’ उहाँले भन्नुभयो ।
रसुवाको भोटेकोशी बाढीका कारण टनेलमा फसेका नागरिकको उद्धारमा सरकारले थप प्रभावकारी ढंगले काम गर्नुपर्नेमा सांसद केसीले जोड दिनुभयो।
