काठमाडौँ। पूर्वराज्यमन्त्री एवं उद्योगपति मोतीलाल दुगडले पेट्रोलियम पदार्थ र ग्यासको चर्चाका बीच अन्य दैनिक उपभोग्य वस्तुको अस्वाभाविक मूल्यवृद्धि ओझेलमा परेको बताउनुभएको छ ।
नेपाल आर्थिक पत्रकार समाज (सेजोन) द्वारा काठमाडौंमा आयोजित ‘बाढीपछिको आपूर्ति र मूल्य श्रृङ्खलामा परेको प्रभाव तथा चुनौती’ विषयक कार्यक्रममा बोल्दै उहाँले यस्तो बताउनुभएको हो ।
खाद्य उद्योगीसमेत रहनुभएका दुगडले बजारमा बिस्कुटदेखि साबुनसम्म र भान्सामा प्रयोग हुने हरेक मसलाजन्य वस्तुको मूल्य अकासिएको बताउनु भयो ।
उहाँकाअनुसार हाल बजारमा बेसार, अलैँची, मरिच, धनियाँ, जिरा र खुर्सानी जस्ता अत्यावश्यक सामग्रीको मूल्य विगतको तुलनामा दोब्बरभन्दा बढीले वृद्धि भएको छ ।
उहाँले पेट्रोलियम पदार्थ र ग्यास संवेदनशील वस्तु भएकाले त्यसमा सबैको ध्यान जानु स्वाभाविक भएपनि अन्य उपभोग्य वस्तुको मूल्यवृद्धिले सर्वसाधारणको जनजीवन कष्टकर बनेकोतर्फ सरोकारवालाको ध्यानाकर्षण गराउनु भयो । ग्यासको आपूर्तिमा मात्र केन्द्रित हुँदा अन्य खाद्य वस्तुको आपूर्ति र बढ्दो महँगी नियन्त्रणका प्रयासहरू ओझेलमा परेको उहाँको तर्क छ ।
उहाँले भन्नुभयो, ‘पहिले प्रतिकिलो १५० रुपैयाँ पर्ने बेसारको मूल्य अहिले ३५० रुपैयाँ पुगेको छ । त्यस्तै, १२०० रुपैयाँ पर्ने ठूलो अलैँचीको मूल्य २८०० रुपैयाँसम्म पुगेको छ । भान्सामा नभई नहुने खुर्सानीको धुलो जुन १५० देखि २०० रुपैयाँ प्रतिकिलो पाइन्थ्यो, आज त्यसको मूल्य ६०० रुपैयाँ पुगिसकेको छ ।’
आफू स्वयं खाद्य उद्योग सञ्चालन गरिरहेकाले बजारको वास्तविकता नजिकबाट नियालेको बताउँदै उहाँले सञ्चारमाध्यम र सरकारले दैनिक उपभोग्य वस्तुको आपूर्ति सहज बनाउन र मूल्य नियन्त्रण गर्न विशेष भुमिका खेल्नुपर्नेमा जोड दिनुभयो । –न्युज एजेन्सी नेपाल
