झापा। बुद्धशान्ति गाउँपालिकाले भोटेकोशी नदीमा आएको विनाशकारी बाढीबाट प्रभावित नागरिकको राहत तथा उद्धारका लागि प्रधानमन्त्री दैवी प्रकोप उद्धार कोषमा रु ३२ लाख ५५ हजार १५४ जम्मा गर्ने निर्णय गरेको छ ।
गाउँपालिकाको विपद् व्यवस्थापन कोष, जनप्रतिनिधि, कर्मचारी तथा सामुदायिक विद्यालयमा कार्यरत शिक्षक एवं कर्मचारीहरूबाट सङ्कलित उक्त रकम कोषमा जम्मा गर्ने निर्णय गरिएको हो ।
गाउँपालिकाका अध्यक्ष मनोज प्रसाईंका अनुसार गाउँपालिकाको विपद् व्यवस्थापन कोषबाट रु पाँच लाख, जनप्रतिनिधिहरूको सात दिनको सेवा सुविधाबापत रु ९९ हजार तथा गाउँपालिकाका सम्पूर्ण कर्मचारीहरूबाट रु १० लाख २० हजार सहयोग जुटाइएको छ ।
कर्मचारीहरूका तर्फबाट अधिकृतस्तरका कर्मचारीको सात दिन, सहायकस्तरका कर्मचारीको पाँच दिन र श्रेणीविहीन तथा सहयोगीस्तरका कर्मचारीको दुई दिनको तलब बराबरको रकम सङ्कलन गरिएको हो । यसैगरी गाउँपालिकाभित्रका सामुदायिक विद्यालयमा कार्यरत शिक्षक तथा कर्मचारीहरूबाट रु १६ लाख ३६ हजार १५४ जम्मा भएको छ ।
माध्यमिक तहका शिक्षकहरूको सात दिन, आधारभूत तहका शिक्षकको पाँच दिन र सहयोगी कार्यकर्ता तथा कर्मचारीको दुई दिन बराबरको तलब रकम यस सहयोगमा समावेश गरिएको अध्यक्ष प्रसाईंले जानकारी दिनुभयो । रासस
