काठमाडौं । रसुवास्थित भोटेकोशी नदीमा बुधबार बिहान आएको भीषण बाढीपछि नेपाली सेना र निजी क्षेत्रका हेलिकप्टरमार्फत हालसम्म ११४ जनाको हवाई उद्धार गरिएको छ।
नेपाली सेनाले विभिन्न उडानमार्फत ८५ जनाको उद्धार गरेको छ भने निजी क्षेत्रका विभिन्न हेलिकप्टर कम्पनीले २९ जनालाई उद्धार गरेका छन्।
नेपाली सेनाले टिमुरे–धुन्चेबाट ६० जना, टिमुरे–त्रिशूलीबाट १३ जना, मैलुङबाट पाँच जना, बेत्रावतीबाट चार जना तथा त्रिशूलीबाट काठमाडौं तीन जनाको हवाई उद्धार गरेको जनाएको छ।
त्यस्तै, निजी क्षेत्रका हेलिकप्टर कम्पनीमध्ये कैलाश हेलिकप्टरले रसुवाबाट टिचिङ अस्पतालमा पाँच जना, सिम्रिकले रसुवाबाट तीन जना तथा अन्नपूर्ण हेलिकप्टरले रसुवाबाट टिचिङ अस्पतालमा चार जनाको उद्धार गरेका छन्।
प्रभु हेलिकप्टरले रसुवाबाट टिचिङ अस्पतालमा पाँच जना र वीर अस्पतालमा दुई जना, सिम्रिकले रसुवा–टिचिङ अस्पताल दुई जना, फिसटेलले रसुवा–टिचिङ अस्पताल पाँच जना तथा एभरेष्ट हेलिकप्टरले रसुवा–टिचिङ अस्पताल दुई जनाको उद्धार गरेका छन्।
बाढीपछि प्रभावित क्षेत्रमा उद्धार तथा राहत कार्यलाई तीव्र पारिएको छ। नेपाली सेना तथा निजी क्षेत्रका हेलिकप्टरमार्फत थप प्रभावितको उद्धार गर्ने कार्य जारी रहेको जनाइएको छ।
