काठमाडौं । रसुवामा ठूलो बाढीपहिरो आएपछि ट्राफिक प्रहरीले चार जिल्लातर्फ जाने सवारीसाधनलाई काठमाडौंमै रोकेको छ।
काठमाडौं उपत्यका ट्राफिक प्रहरी कार्यालयका एसपी नरेशराज सुवेदीका अनुसार काठमाडौं हुँदै रसुवा, नुवाकोट, चितवन र धादिङतर्फ जान लागेका सवारीसाधनलाई काठमाडौंमै रोकिएको हो।
बाढीपहिरोको जोखिमलाई मध्यनजर गर्दै ती जिल्लातर्फ जाने सवारीसाधनलाई तत्कालका लागि रोकिएको प्रहरीले जनाएको छ।
सम्भावित जोखिमबाट यात्रु तथा सवारीसाधनलाई सुरक्षित राख्न यस्तो निर्णय गरिएको हो।
रसुवाको भोटेकोशी नदीमा आएको ठूलो बाढीका कारण आसपासका क्षेत्रमा क्षति पुगेको र नदी तटीय क्षेत्रमा उच्च जोखिम रहेको भन्दै सुरक्षा निकायले सतर्कता अपनाउन आग्रह गरिरहेका छन्।
