काठमाडौँ। राष्ट्रिय स्वतन्त्र पार्टीका सांसद डा. अमरेशकुमार सिंह अख्तियार दुरुपयोग अनुसन्धान आयोगलाई थप सुदृढ र राजनीतिक प्रभावबाट मुक्त बनाउनुपर्ने बताउनुभएको छ ।
बिहीवार सिंहदरबारमा बसेको राज्य व्यवस्था तथा सुशासन समितिको बैठकमा बोल्दै उहाँले संवैधानिक निकायहरूको निष्पक्षता र कार्यशैलीमाथि प्रश्न उठाउँदै व्यापक सुधारको आवश्यकता रहेको बताउनुभएको हो ।
सांसद सिंहले नेपालमा वडा तहदेखि केन्द्रसम्मै भ्रष्टाचार संस्थागत भएको उल्लेख गर्दै जनसरोकारका सरकारी निकायहरूको आलोचना गर्नुभयो ।
प्रहरीको मुद्दा फाँट, सरकारी वकिल कार्यालय, मालपोत र नापी कार्यालयमा आज पनि सर्वसाधारणले घुस नदिई काम गराउन नसक्ने र कर्मचारीबाट दुःख पाउने गरेको उहाँले बताउनु भयो ।
अख्तियार दुरुपयोग अनुसन्धान आयोगको स्वतन्त्रतामाथि चर्चा गर्दै सांसद सिंहले प्रमुख आयुक्त र आयुक्तहरूलाई राजनीतिक दलका नेता वा प्रधानमन्त्रीले आफ्नो अनुकूल चलाउन खोजेको आरोप लगाउनु भयो ।
संवैधानिक निकायहरू राजनीतिक प्रभावबाट पूर्णतः मुक्त हुनुपर्नेमा जोड दिँदै उहाँले ठूला भ्रष्टाचारका काण्डहरूमा अख्तियार मौन बस्ने तर साना कर्मचारीलाई मात्र कानुनी दायरामा ल्याउने गरेकोप्रति असन्तुष्टि व्यक्त गर्नुभयो ।
उहाँले भन्नुभयो, ‘जबसम्म सरकारी वकिलले मुद्दालाई आर्थिक प्रभावमा परेर बलियो वा कमजोर बनाउने काम गरिरहन्छन्, तबसम्म मुलुकमा सुशासन सम्भव छैन । सम्पती शुद्धीकरण र राजस्व अनुसन्धान जस्ता निकायहरूले प्रभावकारी रूपमा काम गरेको भए अख्तियारको यति धेरै खाँचो पर्ने थिएन ।’
अदालत र अख्तियार जस्ता निकायमा बिचौलियाहरूको प्रभाव बढेको दाबी गर्दै उहाँले कानूनको नजरमा सबै समान हुनुपर्ने बताउनु भयो । सांसद सिंहले संवैधानिक निकायहरूमा सेवानिवृत्त कर्मचारीहरूलाई नियुक्ति गर्ने विद्यमान प्रथा अन्त्य गर्न सुझाव दिनुभयो ।
नियुक्ति प्रक्रियामा सुधार नभएसम्म देशमा सुशासन कायम नहुने जिकिर गर्दै उहाँले संवैधानिक निकायका प्रमुखहरू प्रधानमन्त्रीको निम्तोमा बालुवाटार धाउने परम्परा बन्द हुनुपर्ने बताउनु भयो ।
उहाँकाअनुसार यस्ता निकायका पदाधिकारीले आफ्नो पदको गरिमा र स्वतन्त्रता अक्षुण्ण राख्नुपर्छ । –न्युज एजेन्सी नेपाल
