टर्की। टर्कीको मध्य भागमा पर्ने सिभास प्रान्तमा मंगलवार एउटा यात्रुवाहक मिनीबस दुर्घटना हुँदा चार जनाको मृत्यु भएको छ भने अन्य १० जना घाइते भएका छन् ।
सिभास प्रान्तको सुसेहरी जिल्लास्थित डी–८६५ राजमार्गमा उक्त दुर्घटना भएको हो । सिभास गभर्नरको कार्यालयले जारी गरेको विज्ञप्ति अनुसार, सिभासबाट सुसेहरीतर्फ जाँदै गरेको मिनीबस दिउँसो करिव १२ः३० बजे एल्मासेकी–चोकराक गाउँ क्षेत्रमा चालकले नियन्त्रण गुमाउँदा दुर्घटनाग्रस्त भएको थियो ।
अनियन्त्रित भएको बस सडकको छेउमा रहेका ब्यारियरमा ठोक्किएर भीरबाट तल खसेको टर्किस सञ्चारमाध्यम हाबेर टर्कले जनाएको छ । दुर्घटनाका समयमा सवारी साधनमा कुल १४ जना सवार थिए । मृत्यु हुने चार जनाबाहेक घाइते १० मध्ये चार जनाको अवस्था गम्भीर रहेको र अन्य ६ जना सामान्य घाइते भएको बताइएको छ ।
घटनास्थलमा तत्कालै चिकित्साकर्मी, प्रहरी, जेंडरमेरी (प्रहरीको एक इकाइ), दमकल र विपद् तथा आपतकालीन व्यवस्थापन प्राधिकरणका टोलीहरू परिचालन गरिएको थियो । घाइतेहरूलाई उद्धार गरी उपचारका लागि सिभास प्रान्तका नजिकैका विभिन्न अस्पताल तथा स्वास्थ्य संस्थाहरूमा पठाइएको छ ।
स्थानीय प्रशासनले दुर्घटनाको कारणबारे विस्तृत अनुसन्धान शुरु गरेको अधिकारीहरूले जानकारी दिएका छन् । सिन्ह्वा/न्युज एजेन्सी नेपाल
