काठमाडौँ। नेपाली काँग्रेसका नेता डा. शेखर कोईरालाले वर्तमान समयमा देशको अस्तित्व र राष्ट्रियता संकटपूर्ण अवस्थामा रहेको बताउनुभएको छ ।
नेपाली काँग्रेसको संस्थापन इतर समूहद्वारा आयोजित राष्ट्रिय भेलालाई सम्बोधन गर्दै उहाँले मुलुकको पछिल्लो राजनीतिक र सामाजिक परिस्थितिलाई चिर्न काँग्रेस एकजुट हुनुको विकल्प नभएको उल्लेख गर्नुभयो ।
नेता कोईरालाले स्वास्थ्य उपचारपश्चात् करिब पाँच महिनापछि स्वदेश फर्कनुभएका पार्टीका पूर्वसभापति शेरबहादुर देउवाको सुस्वास्थ्यको कामना गर्नुभयो ।
नेता कोइरालाले नेपाली काँग्रेस सधैँ सबैलाई मिलाएर लैजाने र निरंकुशता स्वीकार नगर्ने पार्टी भएको स्मरण गराउनु भयो । उहाँले पार्टीभित्र विद्यमान विभाजित मानसिकतालाई अन्त्य गरी संगठनलाई एक ढिक्का बनाउनुपर्नेमा जोड दिनुभयो ।
काँग्रेस एकजुट भएमा मात्र अन्य राजनीतिक दल र शक्तिहरूसँग सहकार्य र एकताको वातावरण बन्ने र त्यसले राष्ट्रियतालाई थप मजबुत बनाउने उहाँको तर्क छ ।
उहाँले भन्नुभयो, ‘मुलुक अहिले अत्यन्त संकटग्रस्त अवस्थाबाट गुज्रिरहेको छ । देशको अस्तित्व र राष्ट्रियतामाथि खतरा उत्पन्न भएको छ । यो परिस्थिति किन निर्माण भयो भन्नेबारे हामीले गम्भीर समीक्षा गर्न आवश्यक छ । संसद कुन अवस्थामा छ भन्ने हामी सबैले देखिरहेकै छौँ । प्रजातन्त्रको मूल मन्त्र मानिने प्रेस स्वतन्त्रतामाथि अहिले अध्याँरो बादल छाउन थालेको छ । यसलाई चिर्न नेपाली कांग्रेसले नै नेतृत्वदायी भूमिका खेल्नुपर्छ ।’
न्यायपालिकाको निष्पक्षता र स्वतन्त्रताका विषयमा बोल्दै नेता कोईरालाले न्यायालयको निर्णयलाई काँग्रेसले सधैँ सम्मान गर्ने बताउनु भयो ।–न्युज एजेन्सी नेपाल
