काठमाडाैँ । कपिलवस्तुको शुद्धोधन गाउँपालिका–६ बिमियास्थित तौलिहवा–भैरहवा सडकखण्डमा मोटरसाइकलले साइकललाई ठक्कर दिँदा पाँच जना घाइते भएका छन्।
शुक्रबार बिमियाबाट पकडीतर्फ आउँदै गरेको लु ३३ प १५७७ नम्बरको डिस्कभर १२५ सीसी मोटरसाइकलले सोही दिशातर्फ गइरहेका साइकलयात्रीलाई ठक्कर दिएको प्रहरीले जनाएको छ।
दुर्घटनाको खबर प्राप्त हुनासाथ इलाका प्रहरी कार्यालय पकडीबाट प्रहरी सहायक निरीक्षकको कमाण्डमा ६ जना ट्राफिक प्रहरीसहितको टोली घटनास्थल पुगेको थियो। प्रहरीले घाइतेहरूको उद्धार गरी उपचारका लागि नेशनल हेल्थ केयर सेन्टर पकडी पठाएको जनाएको छ। मोटरसाइकल र साइकल प्रहरीले नियन्त्रणमा लिएको छ।
दुर्घटनामा साइकलयात्री मायादेवी गाउँपालिका–२ भैसकुण्डाका ५० वर्षीय रामऔतार लोध घाइते भएका छन्। उनको ढाड, बायाँ हातको कुइनो र कुममा चोट लागेको छ। उनको अवस्था मध्यम रहेको प्रहरीले जनाएको छ।
मोटरसाइकल चालक रुपन्देहीको लुम्बिनी सांस्कृतिक नगरपालिका–८ भरवलियाका ४० वर्षीय सकिल अहमद खानको बाहिरी चोट नदेखिए पनि भित्री असर हुन सक्ने र बोल्न नसक्ने अवस्था रहेको प्रहरीले जनाएको छ। उनको अवस्था मध्यम छ। चालकको मापसे परीक्षण खुल्न सकेको छैन भने सवारी चालक अनुमतिपत्रसमेत साथमा नभएको बताइएको छ।
मोटरसाइकलमा पछाडि सवार चालकका ११ वर्षीय छोरा बसिद खानलाई चोट नलागे पनि शरीर दुखेको छ। उनको अवस्था सामान्य रहेको छ। त्यस्तै, चालकका ९ वर्षीय छोरा जहिर खानको दाहिने खुट्टाको घुँडामा चोट लागेको छ भने अवस्था सामान्य छ। चालककी ३ वर्षीया छोरी सेफा खानको पेट दुखेको र उनको अवस्था पनि सामान्य रहेको प्रहरीले जनाएको छ।
दुर्घटनास्थल इलाका प्रहरी कार्यालय पकडीबाट करिब १.५ किलोमिटर पूर्वमा पर्छ।
