काठमाडौं । नेपाल उद्योग परिसंघ (सिएनआई)का अध्यक्ष वीरेन्द्रराज पाण्डेले मुलुकमा सुशासन कायम गर्न सरकारी सेवाहरू ‘कन्ट्याक्टलेस, पेपरलेस र फेसलेस’ हुनुपर्ने बताउनुभएको छ ।
काठमाडौंमा आयोजित एक अभिमुखीकरण कार्यक्रममा बोल्दै अध्यक्ष पाण्डेले सरकारी सेवा पूर्णरूपमा डिजिटल प्रणालीमा आधारित भए सेवा प्रवाह प्रभावकारी हुनुका साथै समय र लागतसमेत बचत हुने बताउनुभयो ।
उद्योग विभागका सबै सेवा डिजिटल प्रणालीमार्फत सञ्चालन गर्ने तयारी सकारात्मक भएको उल्लेख गर्दै उहाँले विगतमा डिजिटल प्रणाली लागू गर्ने भनिए पनि सेवाग्राहीले फाइल बोकेर कार्यालय धाउनुपर्ने अवस्था रहेको स्मरण गर्नुभयो । आगामी दिनमा त्यस्तो अवस्था दोहोरिन नहुनेमा विभाग गम्भीर हुनुपर्ने उहाँको भनाइ छ ।
“सुशासनको आधारभूत पक्ष भनेको कन्ट्याक्टलेस, पेपरलेस र फेसलेस पहल हो । डिजिटल प्रणालीमा गएर फेरि प्रिन्ट गरेर फाइल लिएर जानुपर्ने अवस्था हुनुहुँदैन,” उहाँले भन्नुभयो ।
अध्यक्ष पाण्डेले डिजिटल सार्वजनिक पूर्वाधार निर्माण गरी सरकारी निकायका प्रणालीहरूलाई आपसमा अन्तरसम्बन्धित बनाउनुपर्नेमा जोड दिनुभयो । विभिन्न निकायमा एउटै विवरण पटक–पटक प्रविष्ट गर्नुपर्ने अवस्थाको अन्त्य गर्दै प्रणालीहरूलाई एकीकृत बनाउनुपर्ने उहाँको भनाइ छ ।
डिजिटल प्रणालीको प्रभावकारी कार्यान्वयनले ‘कस्ट अफ डुइङ बिजनेस’ घटाउनुका साथै सरकारी सेवाको दक्षता र प्रभावकारिता बढाउने उहाँले बताउनुभयो । यसबाट स्वदेशी तथा विदेशी लगानीकर्ता र प्रत्यक्ष वैदेशिक लगानी (एफडीआई) आकर्षित गर्नसमेत सहयोग पुग्ने उहाँको विश्वास छ ।
उद्योग विभागका सेवा पूर्णरूपमा डिजिटल प्रणालीमा रूपान्तरण हुनु निजी क्षेत्रका लागि पनि सकारात्मक भएको भन्दै पाण्डेले यसबाट लगानी तथा व्यवसाय सञ्चालनका क्रममा हुने प्रशासनिक झन्झट कम हुने अपेक्षा व्यक्त गर्नुभयो ।
