काठमाडौं । मलेसियाको पुत्राजायास्थित पीआईसीसीमा आयोजना भएको जिएएमएमए एसियन च्याम्पियनसिप २०२६ मा नेपाली खेलाडीहरूले उत्कृष्ट प्रदर्शन गर्दै पदक जितेका छन्।
सन् २०२६ जुलाई २८ देखि अगस्ट २ सम्म मलेसिया मिक्स्ड मार्सल आर्ट्स संघको आयोजनामा सम्पन्न प्रतियोगितामा नेपालका तीन खेलाडीले पदक हासिल गरेका हुन्।
प्रतियोगिताको यू–१६, ४२ केजीमुनि तौल समूहमा प्रकृति राईले कास्य पदक जितेकी छन्। त्यस्तै यू–१६, ४६ केजीमुनि तौल समूहमा रचना सिल्वालले रजत पदक हासिल गरेकी छन् भने यू–१८, ६० केजीमुनि तौल समूहमा एलिश बोम्जनले कास्य पदक जितेका छन्।
उक्त प्रतियोगितामा मार्सल आर्ट अर्गनाइजेसन नेपालका अध्यक्ष एवं जिएएमएमए नेपालका रेफ्री राजिव महर्जन, जिएएमएमए नेपालका अध्यक्ष विनोद महर्जन, टिम प्रशिक्षकद्वय उमेश महर्जन र राज महर्जन तथा टिम व्यवस्थापक सागर चित्रकारको सहभागिता रहेको थियो। अन्तर्राष्ट्रियस्तरको प्रतियोगितामा नेपाली खेलाडीहरूले हासिल गरेको सफलताले नेपालको मार्सल आर्ट्स क्षेत्रको सम्भावना र क्षमतालाई थप उजागर गरेको छ।
