काठमाडौं । सरकारले विभिन्न कानुन संशोधन तथा नयाँ व्यवस्था सम्बन्धी विधेयक संसद्मा पेस गर्न स्वीकृति दिएको छ।
बुधबार बसेको मन्त्रिपरिषद् बैठकले संवैधानिक निकायका पदाधिकारीहरूको पारिश्रमिक, सेवा, सर्त र सुविधा सम्बन्धी ऐन, २०५३ संशोधन गर्न बनेको विधेयक तथा सङ्क्रामक रोग तथा पशु सम्बन्धी विधेयक संसद्मा पेस गर्न स्वीकृति दिएको सरकारका प्रवक्ता सस्मित पोखरेलले जानकारी दिए।
त्यसैगरी, बैठकले राहदानी ऐन, २०७६ संशोधन गर्न बनेको विधेयक, मानव बेचबिखन तथा ओसारपसार (नियन्त्रण) पहिलो संशोधन विधेयक, बालश्रम (निषेध तथा नियन्त्रण) सम्बन्धी विधेयक, आन्तरिक वायुसेवाको दायित्व सम्बन्धमा व्यवस्था गर्न बनेको विधेयक, मेलमिलाप सम्बन्धी ऐन, २०६८ संशोधन गर्न बनेको विधेयक तथा कर्मचारी सञ्चय कोष ऐन संशोधन सम्बन्धी विधेयक पनि संसद्मा पेस गर्न स्वीकृति दिएको जनाएको छ।
सरकारले कानुनी तथा संस्थागत सुधारलाई अघि बढाउने उद्देश्यले यी विधेयक संसद्मा दर्ता गर्ने प्रक्रिया अगाडि बढाएको हो।
