काठमाडाैँ । नेकपा (एमाले) का राष्ट्रिय सभा संसदीय दलका नेता डा. प्रेमप्रसाद दंगालले संवैधानिक निकायका पदाधिकारीले प्रश्तुत गर्ने कार्ययोजना मापनयोग्य र नतिजामुखी हुनुपर्ने बताउनुभएको छ ।
प्रश्तावित निर्वाचन आयुक्त गुरुप्रसाद वाग्लेको संसदीय सुनुवाईका क्रममा मंगलवार आफ्नो धारणा राख्दै नेता दंगालले यस्तो बताउनुभएको हो । सुनुवाई समितिको कार्यविधिअनुसार प्रश्तावित पदाधिकारीले प्रश्तुत गर्ने अवधारणा र कार्ययोजना वस्तुनिष्ठ हुनुपर्नेमा जोड दिनुभयो ।
उहाँले संवैधानिक निकायका प्रतिवेदनहरूउपर संसदीय समितिमा छलफल र समीक्षा हुने प्रक्रिया शुरु भइसकेकाले पदाधिकारीहरूको कार्यसम्पादन मूल्यांकन सोही आधारमा गरिने स्पष्ट पार्नुभयो ।
डा. दंगालले सूचना प्रविधिको विकाससँगै निर्वाचन प्रणालीमा देखिएका नवीन चुनौतीहरूप्रति चासो व्यक्त गर्नुभयो । प्रविधिले जीवन सहज बनाए पनि सामाजिक सञ्जाल, कृत्रिम बौद्धिकता (एआई) र अल्गोरिदमका माध्यमबाट फैलिने गलत सूचना तथा दुष्प्रचारले लोकतन्त्र र निर्वाचनको विश्वसनीयतामाथि जोखिम बढाएको उहाँको तर्क छ । उहाँले यस्ता नकारात्मक प्रवृत्तिलाई नियमन र नियन्त्रण गरी स्वच्छ तथा निष्पक्ष निर्वाचन सुनिश्चित गर्न प्रश्तावित आयुक्तसँग ठोस दृष्टिकोण माग गर्नुभयो ।
नेता दंगालले निर्वाचनमा मतदाताको न्युन उपस्थितिको विषयलाई गम्भीरताका साथ उठाउनुभयो। गत निर्वाचनमा करिव ६० प्रतिशत मात्र मतदान हुनुलाई कमजोर मान्दै उहाँले मतदानको अनुपात बढाउनु मुख्य चुनौती रहेको बताउनु भयो । सर्वोच्च अदालतको निर्देशनात्मक आदेशअनुसार विदेशमा रहेका नेपाली नागरिकलाई मताधिकार सुनिश्चित गर्ने र आन्तरिक बसाइँसराइ, ज्येष्ठ नागरिक, विद्यार्थी तथा अपाङ्गता भएका व्यक्तिहरूका लागि मतदान प्रक्रिया सहज बनाउने विषयमा ठोस योजना आवश्यक रहेको उहाँको भनाइ छ ।–न्युज एजेन्सी नेपाल
